കൊച്ചി:ഓഖി ചുഴലിക്കാറ്റിനെ തുടർന്ന് കാണാതായ ഒരാളുടെ മൃതദേഹം കൂടി കണ്ടെടുത്തു. ആലപ്പുഴ തീരത്തു നിന്നും 40 നോട്ടിക്കൽ മൈൽ അകലെ കടലിൽ നിന്നാണ് മൃതദേഹം കണ്ടെത്തിയത്.മൃതദേഹം തിരിച്ചറിഞ്ഞിട്ടില്ല.രാത്രി പത്തുമണിയോടുകൂടി മൃതദേഹം ആലപ്പുഴ അഴീക്കൽ ഹാർബറിൽ എത്തിക്കുമെന്നാണ് വിവരം.ഫിഷറീസ് എൻഫോഴ്‌സ്‌മെന്റ് വിഭാഗമാണ് തിരച്ചിൽ നടത്തിയത്.
തിരുവനന്തപുരം:ഓഖി ചുഴലിക്കാറ്റിൽ കാണാതായവർക്കായുള്ള തിരച്ചിൽ പത്തുദിവസം കൂടി തുടരണമെന്ന് സർക്കാർ കോസ്റ്റ് ഗാർഡ്,വ്യോമ-നാവിക സേന എന്നിവരോട് ആവശ്യപ്പെട്ടു. ഇതുമായി ബന്ധപ്പെട്ട് ചീഫ് സെക്രെട്ടറി നേവിക്കും കോസ്റ്റ് ഗാർഡിനും കത്തയച്ചിട്ടുണ്ട്.നാവിക സേനയും തീരദേശ സേനയും ആവശ്യമായ കപ്പലുകൾ ഉപയോഗിച്ച് ആഴക്കടലിൽ തിരച്ചിൽ നടത്തണമെന്നും മത്സ്യത്തൊഴിലാളികളെ തിരച്ചിലിനു ഒപ്പം കൂട്ടണമെന്നും കത്തിൽ ആവശ്യപ്പെടുന്നുണ്ട്.രക്ഷപ്പെടുന്നവർക്ക് ചികിത്സ നൽകുന്നതിനും കണ്ടെത്തുന്ന മൃതദേഹങ്ങൾ സൂക്ഷിക്കുന്നതിന് തീരദേശങ്ങളിൽ പ്രത്യേക സംവിധാനം ഒരുക്കണമെന്ന് ആരോഗ്യ വകുപ്പിന് നിർദേശം നൽകും.പത്തു ദിവസത്തിന് ശേഷം സ്ഥിതിഗതികൾ വിലയിരുത്തി തുടർനടപടികൾ സ്വീകരിക്കുമെന്നും ചീഫ് സെക്രെട്ടറി പറഞ്ഞു.
നോയിഡ: ഡൽഹിക്ക് സമീപം ഗ്രേയിറ്റർ നോയിഡയിലെ ഫ്ലാറ്റിൽ അമ്മയെയും പ്രായപൂർത്തിയാകാത്ത മകളെയും കൊല്ലപ്പെട്ട നിലയിൽ കണ്ടെത്തിയ സംഭവത്തിൽ പതിനഞ്ചുകാരൻ മകൻ അറസ്റ്റിലായി.ചോദ്യം ചെയ്യലിൽ ഇയാൾ കുറ്റം സമ്മതിച്ചു.പിസ കട്ടർ ഉപയോഗിച്ചാണ് താൻ കൊലപാതകം നടത്തിയതെന്നും അമ്മ വഴക്കുപറഞ്ഞതിലുള്ള പ്രതികാരമാണ് കൊലപാതകമെന്നും ഇയാൾ പറഞ്ഞു.കഴിഞ്ഞ ചൊവ്വാഴ്ചയാണ് നോയിഡയ്ക്ക് സമീപം ഗൗർ പട്ടണത്തിലെ ഫ്ലാറ്റിൽ അഞ്ജലി അഗർവാൾ (40), മകൾ കനിഹ (12) എന്നിവരുടെ മൃതദേഹങ്ങൾ കണ്ടെത്തിയത്. പിന്നാലെ മകനെ സ്ഥലത്തു നിന്നും കാണാതാവുകയായിരുന്നു. ഭാര്യയെ ഫോണിൽ വിളിച്ച് കിട്ടാത്തതിനെ തുടർന്ന് ഭർത്താവ് സമീപത്ത് താമസിച്ചിരുന്ന ബന്ധുക്കളെ വിവരം അറിയിക്കുകയായിരുന്നു. ബന്ധുക്കളും അയൽവാസികളും എത്തിയപ്പോൾ ഫ്ലാറ്റ് പുറത്തുനിന്നും പൂട്ടിയ നിലയിലാണ് കണ്ടെത്തിയത്. പിന്നീട് ഇവർ വിവരം അറിയിച്ചതനുസരിച്ച് പോലീസ് എത്തി വാതിൽ തകർത്ത് ഫ്ലാറ്റിൽ കയറിയപ്പോഴാണ് മൃതദേഹം കണ്ടെത്തിയത്.സംഭവത്തിന് ശേഷം ഒളിവിൽ പോയ ഇവരുടെ മകനെ വെള്ളിയാഴ്ച വൈകിട്ട് ഉത്തർപ്രദേശിലെ മുഗൾസരായിയിൽ നിന്നാണ് പോലീസ് കസ്റ്റഡിയിലെടുത്തത്. ഇവിടെ നിന്നും പതിനഞ്ചുകാരൻ പിതാവിന്‍റെ മൊബൈൽ ഫോണിലേക്ക് വിളിച്ചതോടെ പോലീസ് സ്ഥലം തിരിച്ചറിഞ്ഞ് അറസ്റ്റ് ചെയ്യുകയായിരുന്നു.വീട്ടിൽ നിന്നും പണം കൈക്കലാക്കി ഒരു ബാഗുമായി മുങ്ങിയ കൗമാരക്കാരൻ ആദ്യം പഞ്ചാബിലെ ലുധിയാനയിലേക്കാണ് പോയത്. പിന്നീട് ചണ്ഡിഗഡിലും ഷിംലയിലും എത്തി. ഷിംലയിൽ നിന്നും വീണ്ടും ചണ്ഡിഗഡിൽ എത്തിയ ശേഷം റാഞ്ചിക്ക് പോയി. ഇവിടെ നിന്നാണ് യുപിയിലെ മുഗുൾസാരായിയിൽ എത്തിയത്.സംഭവത്തിൽ വിശദമായ അന്വേഷണം പോലീസ് തുടരുകയാണ്.
കട്ടപ്പന:കട്ടപ്പനയിൽ എട്ടുദിവസം പ്രായമുള്ള കുഞ്ഞിനെ അമ്മ കഴുത്തുഞെരിച്ച് കൊന്നു. സംഭവത്തിൽ കട്ടപ്പന മുറിക്കാടുകുടി സ്വദേശിനി സന്ധ്യയെ പോലീസ് അറസ്റ്റ് ചെയ്തു.വ്യാഴാഴ്ച രാവിലെയാണ് കുഞ്ഞിനെ മരിച്ച നിലയിൽ കണ്ടെത്തിയത്.എന്നാൽ കുഞ്ഞിന്റെ കഴുത്തിൽ പാടും മുറിവും കണ്ടെത്തിയതിനെ തുടർന്ന് പോലീസ് അസ്വാഭാവിക മരണത്തിനു കേസെടുത്തിരുന്നു.പിന്നീട് നടന്ന പോസ്റ്റ്‌മോർട്ടത്തിലെ കുഞ്ഞു മരിച്ചത് ശ്വാസം മുട്ടിയാണെന്ന് കണ്ടെത്തുകയായിരുന്നു.ഇതേ തുടർന്ന് നടത്തിയ ചോദ്യം ചെയ്യലിൽ സന്ധ്യ കുറ്റം സമ്മതിക്കുകയായിരുന്നു.
കണ്ണൂർ:പാനൂരിൽ ഗെയിൽ പൈപ്പ്ലൈൻ പദ്ധതിയുടെ പൈപ്പിടൽ നാട്ടുകാർ തടഞ്ഞു.അറിയിപ്പ് നൽകാതെ പണി തുടങ്ങിയെന്ന് ആരോപിച്ചാണ് നാട്ടുകാർ പണി തടഞ്ഞത്.64 കിലോമീറ്റർ ദൂരത്തേക്കുള്ള പൈപ്പിടൽ ജോലിയാണ് നാട്ടുകാർ നിർത്തിവെയ്പ്പിച്ചത്.പൈപ്പിടൽ നടക്കുന്ന സ്ഥലത്തേക്ക് നാട്ടുകാർ പ്രതിഷേധമാർച്ചും സംഘടിപ്പിച്ചു.എന്നാൽ മാർച്ച് പോലീസ് തടഞ്ഞു.
കണ്ണൂർ:കണ്ണൂർ മുനിസിപ്പാലിറ്റിയിലെ ശുചീകരണ തൊഴിലാളികൾ നടത്താനിരുന്ന സമരം പിൻവലിച്ചു.മേയർ ഇ.പി ലതയുടെ സാനിധ്യത്തിൽ നടത്തിയ ചർച്ചയുടെ അടിസ്ഥാനത്തിലാണ് തീരുമാനം.തൊഴിലാളികളുടെ അടിസ്ഥാന സൗകര്യങ്ങൾ പോലും പരിഗണിക്കുന്നില്ല എന്ന പരാതിയുമായി രാഷ്ട്രീയ ഭേതമില്ലാതെയാണ് യൂണിയനുകൾ സമരം ചെയ്യാൻ തീരുമാനിച്ചത്. രണ്ടുതവണ സൂചനസമരം നടത്തിയിട്ടും ചർച്ചയ്ക്കുപോലും തയ്യാറാകാത്ത സാഹചര്യത്തിലാണ് രാപ്പകൽ സമരമെന്ന തീരുമാനത്തിൽ യൂണിയനുകൾ എത്തിയത്.തൊട്ടുപിന്നാലെ ഐഎൻടിയുസിയും രംഗത്തെത്തി.ഇതോടെയാണ് മേയർ ചർച്ചയ്‌ക്കെത്തിയത്.ശമ്പള കുടിശ്ശിക ഒരുമാസത്തിനകം നൽകും,ഡി എ കുടിശ്ശിക പിഎഫിലേക്ക് അടയ്ക്കും,തൊഴിലുപകരണങ്ങൾ നൽകും,മാലിന്യം കൊണ്ടുപോകാനുള്ള വാഹനങ്ങൾ ഉടനെ നന്നാക്കി നൽകും, തൊഴിലാളികളുടെ ക്വാർട്ടേഴ്‌സുകൾ നവീകരിക്കാനുള്ള നടപടിയെടുക്കും,യൂണിഫോം തുന്നിക്കാനുള്ള കൂലി ഉടൻ നൽകും എന്നിവയാണ് ചർച്ചയിൽ ഉണ്ടായ പ്രധാന തീരുമാനങ്ങൾ. ഈ മാസം പതിമൂന്നിന് രാപ്പകൽ സമരം തുടങ്ങാനായിരുന്നു സിഐടിയു തീരുമാനിച്ചിരുന്നത്. പന്ത്രണ്ടാം തീയതി കളക്റ്ററേറ്റ് മാർച്ച് നടത്തുവാൻ ഐഎൻടിയുസിയും തീരുമാനിച്ചിരുന്നു.ഈ രണ്ടുസമരങ്ങളും ചർച്ചയെ തുടർന്ന് പിൻവലിച്ചിരിക്കുകയാണ്.
ഇരിക്കൂർ:ഖനനം നടന്നുകൊണ്ടിരിക്കെ ചെങ്കൽപ്പണ ഇടിഞ്ഞു വീണ് രണ്ടുപേർക്ക് പരിക്കേറ്റു.കല്യാട് ചുങ്കസ്ഥാനത്ത് കെ.പി.ആർ പണയിലാണ് അപകടം നടന്നത്.രണ്ട് ചെങ്കൽ ഖനന യന്ത്രങ്ങളും ഒരു മിനി ലോറിയും മണ്ണിനടിയിൽപ്പെട്ടു.നൂറിലധികം തൊഴിലാളികൾ ഇവിടെ തൊഴിൽ ചെയ്യുന്നുണ്ട്. ഉച്ചസമയമായതിനാൽ എല്ലാവരും ഊണുകഴിക്കാൻ പോയിരുന്നതിനാൽ വൻ ദുരന്തമാണ് ഒഴിവായത്.30 അടിയോളം ഉയരമുള്ള പണയുടെ ഭിത്തി തകർന്ന് ഖനന സ്ഥലത്തേക്ക് പതിക്കുകയായിരുന്നു.സംഭവ സമയത്ത് സ്ഥലത്തുണ്ടായിരുന്ന രണ്ടുപേർ ഓടിരക്ഷപ്പെടുന്നതിനിടെ കല്ലുകൾ തെറിച്ചാണ് ഇവർക്ക് പരിക്കേറ്റത്.ഖനനം നടക്കുന്ന സ്ഥലത്തുതന്നെ നിർത്തിയിട്ടിരിക്കുകയായിരുന്ന ഖനന യന്ത്രങ്ങളും മിനിലോറിയും ഇതോടെ മണ്ണിനടിയിൽപ്പെട്ടു. മറ്റുസ്ഥലങ്ങളിൽ നിന്നും ജെസിബി എത്തിച്ചാണ് മണ്ണിനടിയിൽ മൂടിക്കിടന്ന ലോറികളും ഖനന യന്ത്രങ്ങളും പുറത്തെടുത്തത്.
തലശ്ശേരി:റോഡ് നന്നാക്കുന്നതിനിടെ ബോംബ് കണ്ടെത്തിയതിനെ തുടർന്ന് തലശ്ശേരി-മാഹി ബൈപ്പാസിന്റെ പ്രവൃത്തി നിർത്തിവെച്ചു.കേരളം-മാഹി അതിർത്തിയിൽ പാറാലിലാണ് ബോംബ് കണ്ടെത്തിയത്.15 മീറ്റർ മാത്രമേ പ്രവൃത്തി തീരാൻ ബാക്കിയുണ്ടായിരുന്നുള്ളൂ. എന്നാൽ ബോംബ് കണ്ടെത്തിയതോടെ കരാറുകാർ പണി തുടരാൻ വിസമ്മതിക്കുകയായിരുന്നു. തൊഴിലാളികളും പണിയെടുക്കാൻ തയ്യാറായില്ല.പാറാൽ രാഷ്ട്രീയ സംഘർഷം നടക്കുന്ന സ്ഥലമാണെന്നും അതിനാൽ ഇനിയും ബോംബ് കണ്ടെത്തിയേക്കാമെന്ന് നാട്ടുകാർ പറഞ്ഞതായി കരാറുകാർ അറിയിച്ചു.തൊഴിലാളികൾക്ക് പണിയെടുക്കാൻ ഭയമുണ്ടെന്ന് ദേശീയപാത അതോറിറ്റിയെ അറിയിച്ചതായും കരാറുകാർ പറഞ്ഞു.എന്നാൽ കിട്ടിയത് ബോംബാണെന്ന് ഉറപ്പിക്കാനാകില്ലെന്നും ചിലപ്പോൾ ടെന്നീസ് ബോളിനു മുകളിൽ ബോംബ് കെട്ടുന്ന മാതൃകയിൽ കെട്ടിയതായിരിക്കാമെന്നും പോലീസ് പറഞ്ഞു.കാസർകോഡ് തലപ്പാടി മുതൽ ഇടപ്പള്ളിവരെ ദേശീയപാത നാലുവരിയാക്കി വികസിപ്പിക്കുന്നതിന്റെ ഭാഗമായാണ് തലശ്ശേരി-മാഹി ബൈപാസ്സ് നിർമിക്കുന്നത്.
കണ്ണൂർ:അടിയന്തിര സാഹചര്യങ്ങൾ നേരിടാൻ ആളുകളെ സജ്ജീകരിക്കുക എന്ന ലക്ഷ്യത്തോടെ കണ്ണൂർ ജില്ലാപഞ്ചായത്തിന്റെ നേതൃത്വത്തിൽ ദുരന്തനിവാരണ സേനയെ നിയമിക്കുന്നു.യുവകർമ സേന എന്നപേരിലാണ് സേനയെ നിയമിക്കുക.പദ്ധതിയുടെ പ്രൊജക്റ്റും സാമ്പത്തിക സഹായവുമെല്ലാം ജില്ലാപഞ്ചായത്തിന്റേതാണ്.ട്രോമാ കെയർ,പ്രഥമ ശുശ്രൂഷ,പ്രകൃതി ദുരന്തങ്ങളെ നേരിടാനുള്ള പരിശീലനങ്ങൾ എന്നിവയാണ് പദ്ധതിയിലൂടെ നൽകുന്നത്.പദ്ധതിയുടെ ആദ്യഘട്ടത്തിൽ എല്ലാ പഞ്ചായത്തിൽ നിന്നുമുള്ള അഞ്ചുവീതം യുവാക്കൾക്ക് പരിശീലനം നൽകും.മൂന്നു യുവാക്കൾക്കും രണ്ടു യുവതികൾക്കുമാണ് പരിശീലനം നൽകുക.ഇങ്ങനെ പരിശീലനം നേടുന്നവരുടെ നേതൃത്വത്തിൽ എല്ലാ വാർഡുകളിലെയും പത്തുപേർക്ക് പരിശീലനം നൽകും.ജില്ലാ ദുരന്ത നിവാരണ അതോറിറ്റിക്കാണ് ഇവർക്കുള്ള പരിശീലന ചുമതല.മുനിസിപ്പൽ,പഞ്ചായത്ത് തലങ്ങളിൽ യുവജനക്ഷേമ ബോർഡിന്റെ യൂത്ത് കോ-ഓർഡിനേറ്റർമാരാണ് പ്രവർത്തനങ്ങൾക്ക് നേതൃത്വം നൽകുക.അതോടൊപ്പം എല്ലാ കുടുംബശ്രീ യൂണിറ്റുകൾ വഴിയും അടിയന്തിര സാഹചര്യം നേരിടാനുള്ള പരിശീലനവും ബോധവൽക്കരണവും നൽകും.ഡിസംബറിൽ ജില്ലാതലത്തിലും ജനുവരിയിൽ പഞ്ചായത്തു തലത്തിലും പരിശീലനം പൂർത്തിയാക്കി ഫെബ്രുവരിയോടെ സേനയെ അണിനിരത്താൻ ആകുമെന്നാണ് പ്രതീക്ഷിക്കുന്നതെന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ് പറഞ്ഞു.
ചേർത്തല:ചേർത്തല ദേശീയപാതയിൽ പതിനൊന്നാം മൈലിൽ വോൾവോ ബസ്സും കാറും കൂട്ടിയിടിച്ച് രണ്ടുപേർ മരിച്ചു.ഇന്ന് രാവിലെയാണ് അപകടം നടന്നത്.തണ്ണീർമുക്കം സ്വദേശി ഹരീഷ്,കഞ്ഞിക്കുഴി സ്വദേശി ശിവറാം എന്നിവരാണ് മരിച്ചത്.