December 2017

തളിപ്പറമ്പ്:തളിപ്പറമ്പ് സഹകരണ ആശുപത്രിയിൽ വൻ അഗ്നിബാധ.ഇന്ന് പുലർച്ചെ മൂന്നുമണിയോടെയാണ് ആശുപത്രി കെട്ടിടത്തിന് തീപിടിച്ചത്. ഫാർമസിയിലുണ്ടായ ഷോർട്ട് സർക്യൂട്ടാണ് അപകടകാരണമെന്നാണ് കരുതുന്നത്.ഉടൻ അഗ്നിശമനസേനകൾ എത്തി തീയണച്ചതിനാൽ വൻ ദുരന്തത്തിൽ നിന്നും രക്ഷ നേടാൻ സാധിച്ചതായി ദൃക്‌സാക്ഷികൾ പറഞ്ഞു.പുക കാരണം ശ്വാസതടസ്സം അനുഭവപ്പെട്ടതിനാൽ അറുപതോളം രോഗികളെ സുരക്ഷിതരായി സമീപത്തെ ആശുപത്രികളിലേക്ക് മാറ്റി.തളിപ്പറബ് ലൂർദ് ആശുപത്രി,പരിയാരം മെഡിക്കൽ കോളേജ് എന്നിവിടങ്ങളിലേക്കാണ് ഇവരെ മാറ്റിയത്.സംഭവം നടക്കുമ്പോൾ ഏകദേശം ഇരുനൂറോളം രോഗികൾ  ആശുപത്രിയിലുണ്ടായിരുന്നു.കണ്ണൂർ എസ്. പിയും, ജില്ലാ കളക്ടർ മീർ മുഹമ്മദ് അലിയും സംഭവസ്ഥലത്തെത്തിയിട്ടുണ്ട്.കണ്ണൂരിൽ നിന്നും തളിപ്പറമ്പിൽ നിന്നും മൂന്നു യൂണിറ്റ് അഗ്നിശമനസേന എത്തിയാണ് തീ അണച്ചത്.

ആലപ്പുഴ: കുഞ്ചാക്കോ ബോബൻ നായകനായ സിനിമയുടെ സെറ്റിൽ സാമൂഹ്യ വിരുദ്ധരുടെ ആക്രമണം. ആലപ്പുഴ കൈനകരിയിൽ ചിത്രീകരണം നടത്തുകയായിരുന്ന കുട്ടനാടൻ മാർപ്പാപ്പ എന്ന സിനിമയുടെ സെറ്റിലാണ് ആക്രമണമുണ്ടായത്.അക്രമത്തിൽ രണ്ട് പ്രൊഡക്ഷൻ മാനേജർമാർക്ക് പരിക്കേറ്റു.സെറ്റിൽ മദ്യപിച്ചെത്തിയ നെടുമുടി സ്വദേശി പ്രിൻസ്,പുന്നമട സ്വദേശി അഭിലാഷ് എന്നിവർ താരങ്ങൾക്കൊപ്പം ഫോട്ടോ എടുക്കണമെന്ന് ആവശ്യപ്പെട്ടു. സിനിമയുടെ അണിയറ പ്രവർത്തകർ ഇതുതടഞ്ഞതോടെ ഇവർ ബഹളമുണ്ടാക്കുകയായിരുന്നു. തുടർന്ന് സെറ്റിൽ നിന്നും പോയ ഇവർ തിരിച്ചു വീണ്ടും ലൊക്കേഷനിൽ എത്തി അണിയറ പ്രവർത്തകരെ ടോർച്ച് ഉപയോഗിച്ച് ആക്രമിക്കുകയായിരുന്നു.ആക്രമണം നടക്കുമ്പോൾ കുഞ്ചാക്കോ ബോബനും സലിം കുമാറും ഉൾപ്പടെയുള്ളവർ സെറ്റിലുണ്ടായിരുന്നു.അണിയറ പ്രവർത്തകരുടെ പരാതിയിൽ കേസെടുത്ത പോലീസ് അഭിലാഷ്,പ്രിൻസ് എന്നിവരെ അറസ്റ്റ് ചെയ്തു.

പറശ്ശിനിക്കടവ്:ഒരു മാസത്തോളമായി മുടങ്ങിക്കിടക്കുകയായിരുന്ന പറശ്ശിനിക്കടവ്-മാട്ടൂൽ ബോട്ട് സർവീസ് പുനരാരംഭിച്ചു.ഇതിനായി പുതിയ ബോട്ട് ഇന്നലെ മുതൽ സർവീസ് നടത്തിത്തുടങ്ങി.നിലവിലുണ്ടായിരുന്ന ബോട്ട് തകരാറായതിനെ തുടർന്ന് അറ്റകുറ്റപ്പണി നടത്തി വരികയാണ്.പറശ്ശിനിക്കടവ് ഉത്സവത്തിന്റെ സമയത്ത് ബോട്ട്  സർവീസ് ഇല്ലാതിരുന്നത് തീർത്ഥാടകരെ  വലച്ചിരുന്നു.കഴിഞ്ഞ ദിവസങ്ങളിൽ ഉണ്ടായ ചുഴലിക്കാറ്റിനെ തുടർന്ന് മാട്ടൂൽ-അഴീക്കൽ ബോട്ട് സർവീസും നിർത്തിവെച്ചിരുന്നു.ഇതോടെ ഈ റൂട്ടിനെ ആശ്രയിച്ചവരും യാത്രാക്ലേശം കൊണ്ട് ബുദ്ധിമുട്ടിയിരുന്നു.ഈ റൂട്ടിലോടുന്ന ബോട്ട് നിരവധി തവണ അപകടത്തിൽപ്പെട്ടിരുന്നു.ചുഴലിക്കാറ്റ് സമയത്തും ഈ ബോട്ട് അപകടത്തിൽപ്പെട്ടിരുന്നു. അതുകൊണ്ടുതന്നെ വേണ്ടത്ര സുരക്ഷാ സംവിധാനം ഒരുക്കാത്ത ഇത്തരം ബോട്ടുകൾ പിൻവലിച്ച് ജലഗതാഗത വകുപ്പ് തന്നെ വളപട്ടണം പുഴയിൽ കൂടുതൽ ബോട്ടുകൾ ഓടിക്കണം എന്ന ആവശ്യം ശക്തമാണ്.

പാനൂർ:ചെണ്ടയാട് നിന്നും ഏഴ് നാടൻ ബോംബുകൾ കണ്ടെടുത്തു.ചെണ്ടയാട് കിഴക്ക് വയൽ സ്റ്റോൺ ക്രഷറിന് സമീപം പണിതുകൊണ്ടിരിക്കുന്ന വീടിന്റെ ഗോവണിപ്പടിയിൽ സൂക്ഷിച്ച നിലയിലാണ് ബോംബുകൾ കണ്ടെത്തിയത്.ഒരു ബോംബ് വീടിന്റെ സമീപത്ത് കാണപ്പെട്ടതിനെ തുടർന്ന് പരിസരവാസികൾ പോലീസിൽ വിവരമറിയിക്കുകയായിരുന്നു.സ്ഥലത്തെത്തിയ പാനൂർ എസ്.ഐ വി.കെ ഷൈജിത്തിന്റെ നേതൃത്വത്തിലുള്ള സംഘം ബോംബ് കസ്റ്റഡിയിലെടുത്ത് നിർവീര്യമാക്കി.അടുത്തകാലത്ത് നിർമിച്ചവയും ഉഗ്രസ്ഫോടന ശേഷി ഉള്ളതുമാണ് ബോംബുകളെന്നു പോലീസ് പറഞ്ഞു.