November 2017

ചെറുപുഴ:ചെറുപുഴ കൊട്ടത്തലച്ചി മലയിൽ തീപിടുത്തം.വ്യാഴാഴ്ച ഉച്ചയോടെയാണ് അതി പരിസ്ഥിതിലോല പ്രദേശമെന്നറിയപ്പെടുന്ന കൊട്ടത്തലച്ചി മലയിലെ പുൽമേടുകൾക്ക് തീപിടിച്ചത്.തീപിടുത്തത്തിൽ മുപ്പതേക്കറോളം വരുന്ന പുൽമേടുകൾ കത്തിനശിച്ചു.ഉച്ച സമയമായതിനാൽ ചൂടും കാറ്റും തീ കൂടുതൽ പടരുന്നതിനിടയാക്കി.പെരിങ്ങോത്തു നിന്നും എത്തിയ അഗ്നിരക്ഷാ സേനാംഗങ്ങളും ചെറുപുഴ പോലീസും നാട്ടുകാരും വനം വകുപ്പ് ജീവനക്കാരും കൂടിയാണ് തീ അണച്ചത്.കൊട്ടത്തലച്ചി മലയുടെ മുകളിൽ എത്തിപ്പെടാൻ റോഡില്ലാത്തതിനാൽ അഗ്നിരക്ഷാ സേനയ്ക്ക് മുകളിലെത്താൻ സാധിച്ചില്ല.പിന്നീട് ചൂരപ്പടവ് തട്ടിൽ എത്തി അവിടെനിന്ന് ജീപ്പിലാണ് സംഘം മലമുകളിലെത്തിയത്.വർഷങ്ങൾക്ക് മുൻപ് ഇവിടെയുണ്ടായ തീപിടുത്തത്തിൽ മലയുടെ ഏതാണ്ട് ഭൂരിഭാഗം പ്രദേശങ്ങളും കത്തിനശിച്ചിരുന്നു.

അഴീക്കോട്: അഴീക്കോട് സിപിഎം പ്രവർത്തകന്‍റെ വീടിനുനേരെ ആക്രമണം.ചൊവ്വാഴ്ച അർധരാത്രി 12ഓടെ സിപിഎം പ്രവർത്തകൻ അഴീക്കൽ വെള്ളക്കല്ലിലെ ലക്ഷ്മണന്‍റെ വീടിനുനേരേയാണ് അക്രമം നടന്നത്.വീടിന്‍റെ മുൻവശത്തെ ജനൽപാളിയുടെ മൂന്നു ജനൽച്ചില്ലുകൾ കല്ലെറിഞ്ഞു തകർത്തു.വളപട്ടണം എസ്ഐ ശ്രീജിത്ത് കൊടേരിയുടെ നേതൃത്വത്തിലുള്ള പോലീസ് സംഘം സ്ഥലത്തെത്തി പരിശോധന നടത്തി. ഞായറാഴ്ച വെള്ളക്കല്ലിൽ നാല് ആർഎസ്എസ് പ്രവർത്തകർക്കു വെട്ടേറ്റിരുന്നു.അഴീക്കലിനു സമീപപ്രദേശമായ ഓലാടത്താഴെയിലും ഞായറാഴ്ച സിപിഎം-എസ്ഡിപിഐ സംഘർഷമുണ്ടായിരുന്നു.ഇതിൽ രണ്ടു സിപിഎം പ്രവർത്തകർക്കും രണ്ട് എസ്ഡിപിഐ പ്രവർത്തകർക്കും പരിക്കേറ്റിരുന്നു. രാഷ്‌ട്രീയ സംഘർഷം വ്യാപിക്കുന്ന പശ്ചാത്തലത്തിൽ ജാഗ്രത പുലർത്താൻ പോലീസ് മേധാവി നിർദേശം നൽകിയിരുന്നു.

തിരുവനന്തപുരം:ജാതിപ്പേര് വിളിച്ച് ആക്ഷേപിച്ചെന്ന പരാതിയിൽ തിരുവനന്തപുരം മേയർ വി.കെ.പ്രശാന്തിനെതിരേ പോലീസ് കേസെടുത്തു. പട്ടികജാതി അതിക്രമം തടയൽ നിയമം ഉപയോഗിച്ചാണ് മേയർ ഉൾപ്പടെ നാല് പേർക്കെതിരെ  കേസ് രജിസ്റ്റർ ചെയ്തിരിക്കുന്നത്. ബിജെപി കൗണ്‍സിലറുടെ പരാതിയിൽ മ്യൂസിയം പോലീസാണ് കേസെടുത്തിരിക്കുന്നത്.അതേസമയം ജാതിപ്പേര് വിളിച്ചുവെന്ന സിപിഎം കൗണ്‍സിലറുടെ പരാതിയിൽ നാല് ബിജെപി അംഗങ്ങൾക്കെതിരേയും പോലീസ് കേസ് രജിസ്റ്റർ ചെയ്തിട്ടുണ്ട്.

കൊല്ലം:സോളാർ കേസ് പ്രതി സരിത നായർക്കും കേരള കോൺഗ്രസ് നേതാവും എംഎൽഎയുമായ കെ.ബി ഗണേഷ് കുമാറിനും എതിരെ അന്വേഷണം ആവശ്യപ്പെട്ട് കോടതിയിൽ ഹർജി സമർപ്പിച്ചു.കൊട്ടാരക്കര കോടതിയിലാണ് ഹർജി സമർപ്പിച്ചിരിക്കുന്നത്. സരിത നൽകിയ കത്ത് വ്യാജമാണെന്ന് കാണിച്ചാണ് ഹർജി സമർപ്പിച്ചിരിക്കുന്നത്.21 പേജുള്ള യഥാർത്ഥ കത്തിന് പകരം കോൺഗ്രസ് നേതാക്കൾക്കെതിരെ വിവാദ ആരോപണങ്ങൾ ഉന്നയിച്ചുള്ള പേജുകൾ ഗണേഷ് കുമാറിന്റെ അഭ്യർത്ഥന പ്രകാരം സരിത ഉൾപ്പെടുത്തുകയായിരുന്നുവെന്നും ഹർജിയിൽ വ്യക്തമാക്കുന്നു.ഹർജി കോടതി അടുത്തമാസം പരിഗണിക്കും.