November 2017

തൊടുപുഴ:നാടക-ചലച്ചിത്ര നടി തൊടുപുഴ വാസന്തി അന്തരിച്ചു.അർബുദ ബാധയെ തുടർന്ന് ദീർഘനാളായി ചികിത്സയിലായിരുന്നു.450 ഓളം മലയാള ചിത്രങ്ങളിൽ അഭിനയിച്ചിട്ടുണ്ട്.നാടക നടനായ അച്ഛൻ രാമകൃഷ്ണൻ നായരുടെ ബാലെ ട്രൂപ്പിലൂടെ ആയിരുന്നു അഭിനയ ലോകത്തേക്കുള്ള അരങ്ങേറ്റം.കെ.ജി ജോർജിന്റെ യവനികയാണ് നടി എന്ന നിലയിൽ വാസന്തിയെ ശ്രദ്ധേയയാക്കിയത്.വാസന്തിയുടെ അവസാന നാളുകൾ ഏറെ ദുരിതം നിറഞ്ഞതായിരുന്നു. അർബുദവും പ്രമേഹവും വേട്ടയാടിയതിനൊപ്പം ഹൃദയ സംബന്ധമായ അസുഖവും ഇവരെ തളർത്തി.പ്രമേഹം മൂർച്ഛിച്ചതോടെ വലതുകാൽ മുറിച്ചുമാറ്റേണ്ടതെയും വന്നു.മാതാപിതാക്കൾക്ക് പുറകെ ഭർത്താവും മരണപ്പെട്ടതോടെ ജീവിതത്തിൽ ഇവർ ഒറ്റപെട്ടു.മക്കളില്ലാത്ത ഇവർ മണക്കാടുള്ള വീട്ടിൽ സഹോദരങ്ങൾക്കൊപ്പമായിരുന്നു താമസം.മമ്മൂട്ടി,സിദ്ധിക്ക്,തുടങ്ങിയ ചലച്ചിത്രരംഗത്തെ പ്രമുഖർ ഇവർക്ക് ആദരാഞ്ജലികളർപ്പിച്ചു.

കോഴിക്കോട്:കോഴിക്കോട് മുക്കത്ത് വീണ്ടും ഗെയില്‍ വിരുദ്ധ സമരം ശക്തിപ്രാപിക്കുന്നു. പൈപ്പ് ലൈന്‍ കടന്ന് പോകുന്ന വിവിധ ഇടങ്ങളിലായി ഇതിനോടകം കൂടുതല്‍ സമരപന്തലുകളുയര്‍ന്നു കഴിഞ്ഞു.ഗെയില്‍ ഇരകള്‍ക്കെതിരെ നടക്കുന്ന പൊലീസ് നടപടിയില്‍ പ്രതിഷേധിച്ച് യൂത്ത് ലീഗിന്റെ നേതൃത്വത്തില്‍ നാളെ മുക്കത്ത് യുവജന പ്രതിരോധവും സംഘടിപ്പിച്ചിട്ടുണ്ട്.കാരശ്ശേരിയില്‍ കഴിഞ്ഞ ദിവസം സര്‍ക്കാര്‍ ഭൂമിയില്‍ പന്തല്‍ കെട്ടിയ സമരക്കാര്‍ ചെങ്ങരതടം. ഏലിയാം പറമ്പ്, വാദിനൂര്‍, പൂക്കോട്ടൂര്‍ എന്നിവിടങ്ങളിലും സമര പന്തല്‍ ഉയര്‍ത്തി.പുതുവൈപ്പിന്‍ സമര സമിതി നേതാക്കളും നര്‍മദാ ബച്ചാവോ ആന്ദോളന്‍ നേതാവ് സന്ദീപ് പാണ്ഡെയും കഴിഞ്ഞ ദിവസം സമര പ്രദേശങ്ങളില്‍ സന്ദര്‍ശനം നടത്തിയിരുന്നു.ഗെയ്ല്‍ പദ്ധതിയുടെ മറവില്‍ നിരപരാധികളെ വേട്ടയാടുന്നത് ഭരണകൂടം അവസാനിപ്പിക്കണമെന്ന് ആവശ്യപ്പെട്ടാണ് യൂത്ത് ലീഗിന്റെ നേതൃത്വത്തില്‍ നാളെ മുക്കത്ത് യുവജന പ്രതിരോധം സംഘടിപ്പിച്ചിരിക്കുന്നത്. ലീഗ് ജനറല്‍ സെക്രട്ടറി പി കെ കുഞ്ഞാലിക്കുട്ടി സംഗമം ഉദ്ഘാടനം ചെയ്യും.

കണ്ണൂർ:മറുനാടൻ തൊഴിലാളികൾക്കായുള്ള ആശ്വാസ് ഇൻഷുറൻസ് പദ്ധതിയിൽ 15000 പേർ അംഗങ്ങളായി.പ്രീമിയം അടയ്ക്കാതെയുള്ള പദ്ധതിയാണ് ഇത്.ഈ പദ്ധതിയിൽ ഉൾപ്പെട്ടിട്ടുള്ളവർക്ക് 15000 രൂപ വരെ ചികിത്സ ചിലവ് ലഭിക്കും.മരണപ്പെടുന്നവരുടെ ആശ്രിതർക്ക് രണ്ടുലക്ഷം രൂപവരെ സഹായധനവും നൽകും.ലേബർ വകുപ്പാണ് പദ്ധതിക്കായുള്ള അപേക്ഷ സ്വീകരിക്കുന്നത്.നിർമാണ മേഖല,ക്വാറി ക്രഷർ യൂണിറ്റ്, മത്സ്യത്തൊഴിലാളി മേഖല എന്നിവിടങ്ങളിലാണ് മറുനാടൻ തൊഴിലാളികൾ കൂടുതലായും ജോലി ചെയ്യുന്നത്.തൊഴിലാളികളുടെ വിവരശേഖരണവും ആരോഗ്യ പരിരക്ഷയും ഉറപ്പുവരുത്തുന്നതാണ് പദ്ധതി.അതേസമയം  പദ്ധതിയിൽ അംഗങ്ങളായ തൊഴിലാളികൾക്ക് ബയോമെട്രിക് കാർഡ് നല്കാനാകാതെ കുഴങ്ങുകയാണ് ഉദ്യോഗസ്ഥർ.കാർഡ് നൽകുന്നതിനുള്ള പതിനഞ്ചോളം മെഷീനുകൾ കണ്ണൂരിന് നൽകുമെന്ന് അറിയിച്ചിരുന്നെങ്കിലും നിലവിൽ മൂന്നെണ്ണം മാത്രമാണ് നൽകിയത്.ഇതാണ് ഉദ്യോഗസ്ഥരെ കുഴപ്പിച്ചിരിക്കുന്നത്. ആധാറുമായി ബന്ധിപ്പിച്ചാണ് ഇൻഷുറൻസ് കാർഡ് നൽകുന്നത്.ആധാർ കാർഡ് ഇല്ലാത്തവർക്ക് തിരിച്ചറിയൽ കാർഡോ മറ്റെന്തെകിലും ഔദ്യോഗിക തിരിച്ചറിയൽ രേഖയോ ഉപയോഗിക്കാം.കഴിഞ്ഞ ദിവസം പാപ്പിനിശ്ശേരിയിൽ മരിച്ച മറുനാടൻ തൊഴിലാളിക്ക് രണ്ടുലക്ഷം രൂപ നല്കാൻ തീരുമാനമായിട്ടുണ്ട്.