തിരുവനന്തപുരം:സംസ്ഥാനത്ത് പച്ചക്കറി വില കുതിക്കുന്നു.കഴിഞ്ഞ രണ്ടുമാസമായി നാലു മുതൽ എട്ടു മടങ്ങു വരെ പച്ചക്കറി വില ഉയർന്നു.സംസ്ഥാനത്തേക്ക് പ്രധാനമായും പച്ചക്കറി എത്തിക്കുന്ന സംസ്ഥാനങ്ങളായ തമിഴ്‌നാട്,കർണാടക,ആന്ധ്രാപ്രദേശ് എന്നിവിടങ്ങളിൽ കാലാവസ്ഥ പ്രതികൂലമായതും കൃഷി നാശവുമാണ് വിലവർദ്ധനവിന്റെ പ്രധാന കാരണമായി അധികൃതർ പറയുന്നത്.സവാളയുടെയും ചെറിയ ഉള്ളിയുടെയും തക്കാളിയുടെയും വിലയാണ് ദിവസേന കൂടിക്കൂടി വരുന്നത്.ഇവ മൂന്നും മലയാളിക്ക് ഒഴിച്ചുകൂടാനാകാത്തതുമാണ്. ഓണത്തിന് മുൻപ് കിലോയ്ക്ക് മുപ്പതു രൂപ ആയിരുന്ന ചെറിയുള്ളിയുടെ വില ഇപ്പോൾ നൂറ്റി എൺപതു രൂപ വരെ ആയിരിക്കുകയാണ്.സവാള വിലയും അൻപതിലേക്ക് കടക്കുകയാണ്. കുറച്ചു നാൾ മുൻപുവരെ പന്ത്രണ്ടു രൂപയായിരുന്നു തക്കാളിയുടെ വിലയും ഇപ്പോൾ അമ്പതു രൂപവരെയായി.അതേസമയം ഇരുനൂറു രൂപയായിരുന്നു മുരിങ്ങക്കായുടെ വില ഇപ്പോൾ എഴുപതു രൂപയായി കുറഞ്ഞിട്ടുണ്ട്.
