വളപട്ടണം:ഓടിക്കൊണ്ടിരിക്കെ വളപട്ടണം പാലത്തിൽ മിനിലോറിയുടെ ടയർ ഊരിത്തെറിച്ചു.ഇതിനെ തുടർന്ന് പാലത്തിൽ ഗതാഗതം സ്തംഭിച്ചു.ഇന്നലെ വൈകുന്നേരം ആറുമണിയോടെയാണ് സംഭവം.ലോറി പാലത്തിൽ കുടുങ്ങിയതോടെ മറ്റു വാഹങ്ങൾ റോഡിന്റെ ഒരു ഭാഗം ചേർന്ന് തലങ്ങും വിലങ്ങും ഓടാൻ ശ്രമിച്ചതോടെ ദേശീയപാതയിൽ പാലത്തിന്റെ ഇരുഭാഗത്തും കിലോമീറ്ററുകളോളം ദൂരത്തിൽ ഗതാഗതക്കുരുക്ക് അനുഭവപ്പെട്ടു.ഏഴുമണിയോടെ കൂടി ഖലാസികൾ എത്തി ലോറി പാലത്തിൽ നിന്നും എടുത്തുമാറ്റിയതോടെയാണ് ഗതാഗതം പുനഃസ്ഥാപിച്ചത്.
കോഴിക്കോട്:കോഴിക്കോട് മുക്കത്ത് ഗെയിൽ വാതക പൈപ്പ് ലൈൻ സ്ഥാപിക്കുന്നതിനെതിരെ നടത്തുന്ന സമരം ഇന്ന് പുനരാരംഭിക്കും.നേരത്തെ പോലീസുമായി സംഘർഷം ഉണ്ടായ എരഞ്ഞിമാവിൽ തന്നെയാണ് സമരം വീണ്ടും തുടങ്ങുന്നത്.പോലീസ് പൊളിച്ചു നീക്കിയ സമരപന്തൽ വീണ്ടും നിർമ്മിക്കും.സർക്കാർ പ്രഖ്യാപിച്ച നഷ്ടപരിഹാരം മതിയായതല്ലെന്നും ജനവാസമേഖലകളെ ഒഴിവാക്കണമെന്നുമുള്ള ആവശ്യത്തിൽ നിന്നും പിന്നോട്ടില്ലെന്നും സമരക്കാർ പറയുന്നു. കെപിസിസി മുൻ അധ്യക്ഷൻ വി.എം സുധീരൻ,എം.ഐ ഷാനവാസ് എം.പി എന്നിവർ ഇന്ന് വൈകുന്നേരം നടക്കുന്ന സമര സംഗമത്തിൽ പങ്കെടുക്കും.പോലീസുമായി ഏറ്റുമുട്ടലിനില്ലെന്നും സമാധാനപരമായ സഹന സമരമാണ് നടത്തുകയെന്നും സമര സമിതി പ്രവർത്തകർ അറിയിച്ചു.
രാജപുരം:ഇരിയ പൊടവടുക്കത്ത് വീട്ടമ്മയെ കുളിമുറിയിൽ മരിച്ച നിലയിൽ കണ്ടെത്തി. ധർമ്മശാസ്താ ക്ഷേത്രത്തിനു സമീപം താമസിക്കുന്ന അമ്പൂട്ടി നായരുടെ ഭാര്യ സി.ലീല(56) ആണ് മരിച്ചത്. ഇന്നലെ വൈകുന്നേരം മൂന്നു മണിയോടെ സ്കൂളിൽ നിന്നും എത്തിയ മകൻ പ്രജിത്ത് അമ്മയെ കാണാത്തതിനെ തുടർന്ന് അന്വേഷിച്ചപ്പോഴാണ് കുളിമുറിയിൽ മരിച്ച നിലയിൽ കണ്ടെത്തിയത്.ഹൃദയാഘാതം മൂലമാണ് മരിച്ചതെന്നാണ് വീട്ടുകാർ ആദ്യം കരുതിയത്.പിന്നീട് മാവുങ്കലിലെ സ്വകാര്യ ആശുപത്രിയിൽ എത്തിച്ചപ്പോൾ ലീലയുടെ കഴുത്തിലുണ്ടായിരുന്ന സ്വർണമാല കാണാത്തതിനെ തുടർന്ന് പ്രജിത്തിന്‌ സംശയം തോന്നി.തുടർന്ന് വീട്ടിലെത്തി അന്വേഷിച്ചെങ്കിലും കണ്ടെത്താനായില്ല.പിന്നീട് വീടിനു പുറകിൽ നിന്നും മാല ലഭിച്ചു.ഇതോടെ മറുനാടൻ തൊഴിലാളികളെ സംശയമുണ്ടെന്ന് പ്രജിത്ത് ബന്ധുക്കളെ വിവരം അറിയിച്ചു. ബന്ധുക്കളുടെ സംശയം ഡോക്റ്റർമാരെ അറിയിച്ചതിനെ തുടർന്ന് നടത്തിയ വിദഗ്ദ്ധ പരിശോധനയിൽ ലീലയുടെ കഴുത്തിലെ പാടുകൾ ശ്രദ്ധയിൽപ്പെടുകയും ഡോക്റ്റർമാർക്കും സംശയമുയരുകയും ചെയ്തു.കൊലപാതകമാണെന്ന് സംശയമുയർന്നതോടെ നാട്ടുകാർ പോലീസിൽ വിവരമറിയിക്കുകയും പോലീസെത്തി ലീലയുടെ വീടിന്റെ തേപ്പു ജോലിയിൽ ഏർപ്പെട്ടിരുന്ന അഞ്ചു മഹാരാഷ്ട്ര തൊഴിലാളികളെ കസ്റ്റഡിയിലെടുക്കുകയുമായിരുന്നു.
തളിപ്പറമ്പ്:പോലീസുകാരിൽ നിന്നും രക്ഷപെടാനായി മണൽ കടത്തുകാർ ഉപേക്ഷിച്ച ലോറി കത്തിച്ച ശേഷം ആക്രിക്കാർക്ക് വിറ്റ സംഭവത്തിൽ തളിപ്പറമ്പ് സ്റ്റേഷനിലെ എഎസ്ഐ ഉൾപ്പെടെ അഞ്ചുപോലീസുകാർക്കെതിരെ നടപടിയെടുക്കാൻ ഡിവൈഎസ്പി ജില്ലാ പോലീസ് മേധാവിക്ക് റിപ്പോർട്ട് നൽകി.ഇക്കഴിഞ്ഞ മൂന്നാം തീയതി രാത്രി കുപ്പം കടവിൽ നിന്നും അനധികൃതമായി മണൽ കടത്തുകയായിരുന്ന ലോറി പോലീസ് കൈകാണിച്ചിട്ടും നിർത്താത്തതിനെ തുടർന്ന് എസ്ഐയുടെ നേതൃത്വത്തിൽ പിന്തുടരുകയായിരുന്നു.പോലീസ് പിന്തുടരുന്നത് കണ്ട മണൽ കടത്തുകാർ ലോറി ഉപേക്ഷിച്ചു രക്ഷപ്പെടുകയായിരുന്നു. ഡ്രൈവറെ കിട്ടാത്തതിനാല്‍ വിവരം ഉന്നതരെ അറിയിച്ച ശേഷം ലോറി പോലീസ് കത്തിച്ചു. കത്തിയ ലോറി പിന്നീട് കുപ്പം ഖലാസികളെ ഉപയോഗിച്ച് സ്ഥലത്തുനിന്ന് മാറ്റിയശേഷം ആക്രികച്ചവടക്കാര്‍ക്ക് വില്‍ക്കുകയായിരുന്നു. കത്തിച്ച വാഹനം കുപ്പത്തെ ആക്രികച്ചവടക്കാരന്‍റെ ഗോഡൗണില്‍ നിന്നും പോലീസ് കണ്ടെത്തിയിട്ടുണ്ട്.സംഭവം പുറത്തായതോടെ ഇതേപ്പറ്റി അന്വേഷിക്കണമെന്നാവശ്യപ്പെട്ട് സിപിഎം തളിപ്പറമ്പ് ഏരിയാ സെക്രട്ടറി പി.മുകുന്ദൻ സിഐക്ക് പരാതി നൽകുകയായിരുന്നു. സാധാരണ രീതിയിൽ പോലീസ് പിടിച്ചെടുക്കുന്ന നിസാര തൊണ്ടിമുതലുകൾ പോലും സ്റ്റേഷനിൽ സൂക്ഷിക്കണമെന്ന ചട്ടം നിലനിൽക്കെ ഈ സംഭവം വിവാദമായിരിക്കുകയാണ്.സംഭവത്തില്‍ പോലീസുകാരില്‍ നിന്നും ആക്രികച്ചവടക്കാരനില്‍ നിന്നും ഖലാസികളില്‍ നിന്നും ഇതിനകം മൊഴിരേഖപ്പെടുത്തിക്കഴിഞ്ഞു.ഇതിനു മുമ്പും പോലീസ് സ്റ്റേഷനില്‍ നിന്നും ഇത്തരത്തില്‍ വാഹനങ്ങള്‍ വിലകൊടുത്തുവാങ്ങിയിട്ടുണ്ടെന്നാണ് കുപ്പത്തെ ആക്രികച്ചവടക്കാരന്‍ മൊഴി നല്‍കിയിരിക്കുന്നത്.
മധുര:നിർമൽ ചിട്ടി തട്ടിപ്പ് കേസിലെ മുഖ്യപ്രതി കെ.നിർമലൻ കീഴടങ്ങി.മധുര ഫസ്റ്റ് ക്ലാസ് മജിസ്‌ട്രേറ്റ് കോടതിയിലാണ് നിർമലൻ കീഴടങ്ങിയത്.കഴിഞ്ഞ രണ്ടു മാസമായി ഇയാൾ ഒളിവിലായിരുന്നു.നേരത്തെ ഇയാൾ മുൻ‌കൂർ ജാമ്യത്തിനായി തിരുവനന്തപുരം ജില്ലാ കോടതിയിലും തമിഴ്‌നാട് ഹൈക്കോടതിയിലെ മധുര ബെഞ്ചിനെയും സമീപിച്ചിരുന്നു.ക്രൈം ബ്രാഞ്ചും തമിഴ്‌നാട് പോലീസുമാണ് കേസിൽ അന്വേഷണം നടത്തുന്നത്.പതിനായിരത്തോളം നിക്ഷേപകരിൽ നിന്നായി 600 കോടിയോളം രൂപ നിർമൽ കൃഷ്ണ ചിട്ടിക്കമ്പനി പിരിച്ചെടുത്തിട്ടുണ്ടെന്നാണ് ആരോപണം.ഇവരിൽ നാലായിരത്തോളം പേരാണ് പരാതിയുമായി രംഗത്തെത്തിയിട്ടുള്ളത്.കേസിൽ അകെ 22 പ്രതികളാണുള്ളത്.ഇവരിൽ അഞ്ചുപേരെ അന്വേഷണ സംഘം നേരത്തെ അറസ്റ്റ് ചെയ്തിരുന്നു.
ന്യൂഡൽഹി: ഇന്ത്യയിലെ വിവിധയിടങ്ങളിൽ അടുത്ത ദിവസങ്ങളിൽ ആക്രമണം നടത്തുമെന്ന് ഇസ്‌ലാമിക് സ്റ്റേറ്റ് സന്ദേശം. തൃശൂർ പൂരവും,കുംഭമേളയും ആക്രമിക്കുമെന്നും ശബ്ദ സന്ദേശത്തിലൂടെ ഐഎസ് മുന്നറിയിപ്പ് നൽകി.പത്ത് മിനിറ്റ് നീണ്ടു നിൽക്കുന്ന സന്ദേശം മലയാളത്തിലാണ് അയച്ചിരിക്കുന്നതെന്നാണ് വിവരം.ആളുകൾ കൂടുന്ന ആഘോഷ പരിപാടികൾക്കിടെ ആക്രമം നടത്തുമെന്നാണ് മുന്നറിയിപ്പ്.പുരുഷ ശബ്ദത്തിലുള്ള മുന്നറിയിപ്പ് ഐഎസിന്‍റേതായി പുറത്തുവരുന്ന അൻപതാമത്തെ ശബ്ദസന്ദേശമാണെന്നാണ് വിവരം. ലാസ്‌വേഗസിലുണ്ടായ വെടിവയ്പിനു സമാനമായ തരത്തിലുള്ള ആക്രമണം നടത്തുമെന്ന് സന്ദേശത്തിൽ സൂചിപ്പിച്ചിട്ടുണ്ട്. തങ്ങൾ ഇത്തരം ആക്രമണങ്ങൾ രാജ്യത്തിന്‍റെ വിവിധ ഭാഗങ്ങളിൽ നടത്തിട്ടുണ്ടെന്നും ലാസ്‌വേഗസിൽ തങ്ങൾക്ക് ഒരു അനുയായി നഷ്ടമായെന്നും സന്ദേശത്തിൽ പറയുന്നു.അഫ്ഗാനിസ്ഥാനിൽ നിന്നുമാണ് സന്ദേശമെത്തിയതെന്നും കാസർഗോട്ടു നിന്നും ഐഎസിൽ ചേരാനായി പോയ റാഷിദ് അബ്ദുള്ള എന്നയാളുടേതാണ് ശബ്ദമെന്നുമാണ് പ്രാഥമിക നിഗമനമെന്നും പോലീസ് വൃത്തങ്ങൾ അറിയിച്ചു.
തിരുവനന്തപുരം:ആരോഗ്യവകുപ്പിലെയും മെഡിക്കൽ വിദ്യാഭ്യാസ വകുപ്പിലെയും ഡോക്റ്റർമാരുടെ പെൻഷൻ പ്രായം ഉയർത്താൻ മന്ത്രിസഭാ യോഗം തീരുമാനിച്ചു.ആരോഗ്യ വകുപ്പിലെ ഡോക്റ്റർമാരുടെ പ്രായം 56 ഇൽ നിന്നും 60 വയസ്സായി ഉയർത്തും.മെഡിക്കൽ വിദ്യാഭ്യാസ വകുപ്പിലെ ഡോക്റ്റർമാരുടെ പെൻഷൻ പ്രായം 60 ഇൽ നിന്നും 62 വയസ്സായി വർധിപ്പിക്കും.പരിചയ സമ്പന്നരായ ഡോക്റ്റർമാരുടെ ദൗർലഭ്യം ആരോഗ്യമേഖലയിലെ പ്രവർത്തനത്തെ പ്രതികൂലമായി ബാധിക്കുന്നത് ഒഴിവാക്കാനായാണ് പെൻഷൻ പ്രായം ഉയർത്താൻ തീരുമാനിച്ചത്.ഇത് കൂടാതെ ശ്രീനാരായണ ഗുരുവിന്റെ ജാതിയില്ല വിളംബരത്തിന്റെ നൂറാം വാർഷികം പ്രമാണിച്ച് സ്ഥാപിക്കുന്ന പ്രതിമ തിരുവന്തപുരത്തു സ്ഥാപിക്കാനും മന്ത്രിസഭാ യോഗം തീരുമാനിച്ചു.ശബരിമലയിൽ ഉത്സവ സീസണിൽ സ്പെഷ്യൽ ഡ്യൂട്ടിക്ക് നിയോഗിക്കപ്പെടുന്നവർക്ക് നൽകുന്ന ലഗേജ് അലവൻസ് 150 രൂപയിൽ നിന്നും 200 രൂപയാക്കാനും തീരുമാനിച്ചു. കേരളത്തിലെ അഞ്ചു ദേവസ്വം ബോർഡുകളിലേക്കും ദേവസ്വം റിക്രൂട്മെന്റ് മുഖേന നടത്തുന്ന നിയമനങ്ങളിൽ മുന്നോക്ക സമുദായങ്ങളിലെ സാമ്പത്തികമായി പിന്നോക്കം നിൽക്കുന്നവർക്ക് പത്തുശതമാനം സംവരണം നൽകാനും ഇന്ന് ചേർന്ന മന്ത്രിസഭാ യോഗം തീരുമാനിച്ചു.
തലശ്ശേരി:പാനൂരിൽ ബസ് ജീവനക്കാർക്ക് മർദനമേറ്റു.ഇതിനെത്തുടർന്ന് ബസുകൾ ഓട്ടം നിർത്തിവെച്ചു.ഇന്ന് രാവിലെ 8.45 ഓടെ കടവത്തൂർ-പാനൂർ-തലശ്ശേരി റൂട്ടിലോടുന്ന അക്ഷയ ബസിലെ ഡ്രൈവർ വിനീത്(27).ക്‌ളീനർ സായത്ത്(22) എന്നിവർക്ക് സെൻട്രൽ ഏലാംകോട് വെച്ച് മർദ്ദനമേൽക്കുകയായിരുന്നു.പാനൂർ-തലശ്ശേരി റൂട്ടിലോടുന്ന ശ്രീഹരി ബസിലെ ഡ്രൈവർ ആഷിത്തിന് ഇന്നലെ മനേക്കരയിൽ വെച്ച് മർദ്ദനമേറ്റിരുന്നു.ഇതിൽ പ്രതിഷേധിച്ച് ഇന്നലെ ബസ് ജീവനക്കാർ പണിമുടക്കിയിരുന്നെങ്കിലും അക്ഷയ ബസ് ജീവനക്കാർ പണിമുടക്കിൽ പങ്കെടുത്തിരുന്നില്ല.ഇതാകാം അക്രമത്തിന് കാരണമെന്നു സംശയിക്കുന്നു.
പാനൂർ: ചെറുപ്പറമ്പ് ചിറ്റാരിതോടിൽ യൂത്ത് ലീഗ് പ്രവർത്തകനായ പറമ്പഞ്ചേരി മഹ്മൂദിനെ(36) കാറ് തടഞ്ഞുനിർത്തി വെട്ടിക്കൊലപ്പെടുത്താൻ ശ്രമം.ഇന്നലെ രാത്രിയാണ് സംഭവം. വീട്ടിൽ നിന്ന് ടൗണിലേക്ക് ഇന്നോവ കാറിൽ പോകുമ്പോൾ കല്ലിടുക്ക് പള്ളിക്ക് സമീപം വച്ച് മഹമൂദ് സംഞ്ചരിച്ച കാറിന് നേരെ ഒരു സംഘം ബോംബെറിയുകയും കാറിൽ നിന്ന് വലിച്ചിറക്കി മഹമൂദിനെ വെട്ടി പരിക്കേൽപ്പിക്കുകയുമായിരുന്നു.ഇദ്ദേഹം സഞ്ചരിച്ച കാറും അക്രമിസംഘം അടിച്ചുതകർത്തിട്ടുണ്ട്. കൈക്കും മുഖത്തും വെട്ടേറ്റ മഹമൂദിനെ തലശേരിയിൽ പ്രാഥമികശുശ്രുഷ നൽകിയ ശേഷം കോഴിക്കോട് സ്വകാര്യ ആശുപത്രിയിൽ പ്രവേശിപ്പിച്ചു.അക്രമത്തിനു പിന്നിൽ സിപിഎം പ്രവർത്തകരാണെന്ന് മഹമ്മൂദ് പറഞ്ഞു.സംഭവത്തിൽ പോലീസ് അന്വേഷണം ആരംഭിച്ചു.
തിരുവനന്തപുരം:ഭൂമി കയ്യേറ്റവുമായി ബന്ധപ്പെട്ട് ആരോപണ വിധേയനായ ഗതാഗത മന്ത്രി തോമസ് ചാണ്ടി രാജിവെച്ചു.രാജിക്കത്ത് പാർട്ടി സംസ്ഥാന അധ്യക്ഷൻ ടി.പി പീതാംബരന് നൽകിയ ശേഷം ഔദ്യോഗിക വാഹനത്തിൽ അദ്ദേഹം ആലപ്പുഴയിലേക്ക് തിരിച്ചു.സംസ്ഥാന അധ്യക്ഷൻ ടി.പി പീതാംബരൻ രാജിക്കത്ത് മുഖ്യമന്ത്രിക്ക് കൈമാറി.ഉച്ചയ്ക്ക് ശേഷം അധ്യക്ഷൻ മാധ്യമങ്ങളെ കാണുമെന്നും അദ്ദേഹം കാര്യങ്ങൾ അറിയിക്കുമെന്നും ചാണ്ടി മാധ്യമങ്ങളോട് പറഞ്ഞു.കായൽ കയ്യേറ്റവുമായി ബന്ധപ്പെട്ട് കലക്റ്റർ സമർപ്പിച്ച റിപ്പോർട്ടിനെതിരെ ഹർജിയുമായി തോമസ് ചാണ്ടി ഇന്നലെ ഹൈക്കോടതിയെ സമീപിച്ചിരുന്നെങ്കിലും കോടതി ഹർജി തള്ളുകയായിരുന്നു.മാത്രമല്ല ഹൈക്കോടതിയുടെ രൂക്ഷ വിമർശനങ്ങൾ ഏറ്റുവാങ്ങേണ്ടതായും വന്നും.ഇതിനെ തുടർന്നണ് തോമസ് ചാണ്ടിയുടെ രാജി ആസന്നമായത്.