October 2017

പാനൂർ:സ്കൂട്ടർ യാത്രക്കാരനെ ഇടിച്ചു വീഴ്ത്തി മൂന്നര ലക്ഷം രൂപ തട്ടിപ്പറിച്ചതായി പരാതി. ഇന്നലെ ഉച്ചയ്ക്ക് പന്ത്രണ്ടു മണിയോടെ പാറാട്-ചെറുവാഞ്ചേരി റോഡിൽ മീത്തലെ കുന്നോത്ത്പറമ്പ് ചേരിക്കൽ കിടാരിയിലാണ് സംഭവം.മൽസ്യ വ്യാപാരിയായ ഷറഫുദീന്റെ പണമാണ് കവർന്നത്.ഇയാൾ പാനൂരിലെ മീൻകടയിൽ നിന്നും ശേഖരിച്ച രണ്ടുലക്ഷം രൂപയും,പാറാട്ടെ കടയിൽ നിന്നും വാങ്ങിയ ഒരുലക്ഷം രൂപയും കയ്യിലുണ്ടായിരുന്ന 50,000 രൂപയുമാണ് തട്ടിപ്പറിച്ചതെന്നാണ് പരാതി.ചെറുവാഞ്ചേരി ഭാഗത്തേക്ക് പോവുകയായിരുന്ന ഷറഫുദീനെ കാറിലെത്തിയ രണ്ടുപേരും മുഖം മൂടി ധരിച്ചു ബൈക്കിലെത്തിയ മൂന്നുപേരും ചേർന്ന് ബൈക്ക് ഇടിച്ചു വീഴ്ത്തിയ ശേഷം പണം കവരുകയായിരുന്നു.കാർ തിരിച്ചറിഞ്ഞതായി സൂചനയുണ്ട്.പോലീസ് അന്വേഷണം ആരംഭിച്ചു.

തലശ്ശേരി:തലശ്ശേരി ഗവ.ബ്രെണ്ണൻ കോളേജിൽ എബിവിപി ജില്ലാ കൺവീനർക്ക് മർദനമേറ്റു. രണ്ടാം വർഷ ബിരുദ വിദ്യാർത്ഥി പി.പി പ്രിജുവിനാണ് മർദനമേറ്റത്.ഇയാളെ തലശ്ശേരി ഇന്ദിരാഗാന്ധി സഹകരണ ആശുപത്രിയിൽ പ്രവേശിപ്പിച്ചു.കാമ്പസിനുള്ളിൽ വെച്ച് ഒരു സംഘം വിദ്യാർത്ഥികളാണ് പ്രിജുവിനെ മർദിച്ചത്.ബോധരഹിതനായി വീണ പ്രിജുവിനെ ഏറെനേരത്തിനു ശേഷം ധർമടം പോലീസ് എത്തിയാണ് ആശുപത്രിയിൽ പ്രവേശിപ്പിച്ചത്. അക്രമത്തിനു പിന്നിൽ എസ്എഫ്ഐ പ്രവർത്തകരാണെന്ന് എബിവിപി ആരോപിച്ചു.

കണ്ണൂർ:കണ്ണൂർ ടൌൺ പോലീസ് സ്റ്റേഷനിൽ ശിശു സൗഹൃദ ബ്ലോക്ക് തുറക്കും നവംബർ 14 ശിശുദിനത്തിൽ പദ്ധതി നടപ്പാക്കാനാണ് തീരുമാനം.ഇഷ്ട്ട കാർട്ടൂൺ കഥാപാത്രങ്ങളും പുസ്തകങ്ങളും കളിപ്പാട്ടങ്ങളും ഇവിടെ ഒരുക്കും.പരാതിയുമായി വരുന്നവർ,കേസുകളിൽ അകപ്പെട്ടവർ,പ്രത്യേക പരിഗണന കിട്ടേണ്ട കേസുകളിലെ കുട്ടികൾ തുടങ്ങിയവർക്ക് ഇനി പേടിക്കാതെ സ്റ്റേഷനിലേക്ക് വരാം.പുസ്തകങ്ങൾ വായിക്കാനും ടി.വി കാണാനുമുള്ള സൗകര്യങ്ങൾ ഇവിടെ സജ്ജമാക്കിയിട്ടുണ്ട്.ഇതിനു പുറമെ കൈക്കുഞ്ഞുങ്ങളുമായി വരുന്ന അമ്മമാർക്കായി പഞ്ഞിക്കിടക്കയുമുണ്ട്.ഒപ്പം തൊട്ടിലും  ശുചിമുറിയും വിശാലമായ വിശ്രമമുറിയും ഒരുക്കും.കുഞ്ഞുങ്ങളെ മുലയൂട്ടാനുള്ള പ്രത്യേക മുറിയും സജ്ജമാക്കും. ലൈബ്രറി സൗകര്യവും  ഉണ്ടാകും.അരക്ഷിത സാഹചര്യങ്ങളിൽ പോലീസ് സ്റ്റേഷനിൽ അഭയം പ്രാപിക്കേണ്ടിവരുന്ന സ്ത്രീകൾക്കും കുട്ടികൾക്കും വേണ്ടിയാണു ഇത്തരത്തിലൊരു സംവിധാനം നടപ്പിലാക്കുന്നതിന് എസ്.ഐ ഷൈജു പറഞ്ഞു.കണ്ണൂർ കൂടാതെ സംസ്ഥാനത്തെ മറ്റ് ആറ് ടൌൺ സ്റ്റേഷനുകളും ശിശുസൗഹൃത സ്റ്റേഷനാകാൻ ഒരുങ്ങുന്നുണ്ട്. ശിശുദിനാഘോഷത്തിന്റെ ഭാഗമായി ബ്ലോക്കിന്റെ സംസ്ഥാനതല ഉൽഘാടനം നടത്താനാണ് അധികൃതരുടെ തീരുമാനം.

ആറളം:ആറളം ഫാം പുനരധിവാസ മേഖലയിൽ വീണ്ടും കാട്ടാന ശല്യം.കഴിഞ്ഞ ദിവസം ഫാമിന്റെ അതിർത്തിയിലെ ആനമതിൽ തകർത്ത കാട്ടാനക്കൂട്ടം ഫാമിന്റെ അധീനതയിലുള്ള ചെക്ക് ഡാം നശിപ്പിച്ചു.പ്രദേശത്തെ ഏഴു തെങ്ങുകളും ആനക്കൂട്ടം കുത്തി വീഴ്ത്തി.തെങ്ങുകൾ വീണു ഇലക്ട്രിക് പോസ്റ്റുകൾ തകർന്നതിനെ തുടർന്ന് പ്രദേശത്തെ വൈദ്യുതി ബന്ധവും താറുമാറായി.നേരത്തെ നാല് ആനകളടങ്ങിയ ഒരു കൂട്ടം ഫാമിനകത്ത് മാസങ്ങളായി താവളമടിച്ചിരുന്നു.ഇവയെ കൂടാതെ രണ്ടു ആനകളും കൂടി ഫാമിലേക്ക് പ്രവേശിച്ചു.കഴിഞ്ഞ ദിവസം ആനമതിൽ  തകർത്ത ഭാഗത്തു കൂടിയാണ് പുതിയ സംഘം ഫാമിനകത്തേക്ക് പ്രവേശിച്ചത്.ഫാമിന്റെ ഒന്നാം ബ്ലോക്കിൽ പൂർണ്ണമായും രണ്ടാം ബ്ലോക്കിൽ ഭാഗികമായും ജലസേചന സൗകര്യം നൽകുന്ന ചെക്ക് ഡാം ആണ് നശിപ്പിക്കപ്പെട്ടത്.ഇതോടെ ജലസേചന സൗകര്യം പൂർണ്ണമായും തടസ്സപ്പെട്ടിരിക്കുകയാണ്.ആറളം വന്യജീവി സങ്കേതത്തെ ജനവാസ മേഖലയുമായി വേർതിരിക്കുന്ന ആനമതിൽ തകർന്നതോടെ ആദിവാസികൾ ഭീതിയിലാണ് കഴിയുന്നത്.പുനരധിവാസ മേഖലയിൽ കാടുമൂടി കിടക്കുന്ന പ്രദേശത്ത് പകൽ സമയത്ത് നിലയുറപ്പിക്കുന്ന കാട്ടാനക്കൂട്ടം രാത്രിയോടെ ഫാമിലേക്ക് പ്രവേശിക്കും.ജനവാസ മേഖലയിൽ ഇറങ്ങിയ ആനകളെ കാട്ടിലേക്ക് തുരത്താനുള്ള ഒരു നടപടിയും ഇത് വരെ സ്വീകരിച്ചിട്ടില്ല. ഇതോടെ രാത്രി വീടിനുള്ളിൽ പോലും സുരക്ഷിതമായി കഴിയാൻ സാധിക്കുന്നില്ല എന്നാണ് ആദിവാസികൾ പറയുന്നത്.