October 2017

കണ്ണൂർ:കണ്ണൂര്‍ ജില്ലയില്‍ പോലീസുകാരുടെ കായിക ക്ഷമതാപരിശോധന തുടങ്ങി.തളിപ്പറമ്പ് സബ് ഡിവിഷനിൽ തളിപ്പറമ്പ് സ്റ്റേഷനിലെ പോലീസുകാര്‍ക്കായി മാങ്ങാട് കെഎപി ക്യാമ്പിലാണ് പരിശോധന നടന്നത്.കേരളത്തില്‍ പോലീസുകാരുടെ കായിക ക്ഷമതാപരിശോധന ആദ്യമായി നടപ്പിലാക്കിയത് കണ്ണൂര്‍ ജില്ലയിലാണ്.ജില്ലാ പോലീസ് മേധാവിയുടെ നിര്‍ദേശപ്രകാരം കണ്ണൂര്‍ ടൗണ്‍ സ്റ്റേഷനിലെ പോലീസുകാരുടെ കായിക ക്ഷമത പരിശോധിച്ചുകൊണ്ടാണ് പദ്ധതിക്ക് തുടക്കംകുറിച്ചത്. 35 വയസിനു താഴെയുളളവരേയും 35 മുതല്‍ 50 വയസുവരെയുളളവരേയും രണ്ട് ഗ്രൂപ്പുകളായി തിരിച്ചാണ് പരിശോധന നടത്തുന്നത്.100 മീറ്റര്‍, 400 മീറ്റര്‍ ഓട്ടം, പുഷ് അപ്പ്, പുള്‍ അപ്പ്, ലോംഗ് ജംപ്, ഹൈജംപ് എന്നീ കായിക ഇനങ്ങളില്‍ പങ്കെടുപ്പിച്ചാണ് പരിശോധന. രാവിലെ ഏഴ് മുതല്‍ 10 വരെ മാങ്ങാട് കെഎപി പരേഡ് ഗ്രൗണ്ടിലാണ് പരിശോധന നടന്നത്.

പയ്യന്നൂർ: കോടതി കേസുമായി ബന്ധപ്പെട്ട തൊണ്ടിമുതലുകൾ സൂക്ഷിക്കുന്ന മുറിയിൽ സൂക്ഷിച്ചിരുന്ന മദ്യം മോഷ്ടിച്ചവർ പിടിയിൽ. ചൂരലിലെ രാജൻ(36),മന്മഥൻ(36)എന്നിവരാണ് പിടിയിലായത്. ചൊവ്വാഴ്ച രാത്രി ഒൻപതോടെയായിരുന്നു സംഭവം.പയ്യന്നൂർ ജുഡീഷൽ ഒന്നാം ക്ലാസ് മജിസ്ട്രേറ്റ് കോടതി കെട്ടിടത്തിന്‍റെ പ്രോപ്പർട്ടി മുറിയിൽ സൂക്ഷിച്ച മദ്യം ഗ്രിൽസിന്‍റെ പൂട്ട് തകർത്തായിരുന്നു മോഷണം. ഫൈൻ അടച്ചതും അദാലത്തുകളിൽ തീർത്തതും വിധിയായതുമായ കേസുകളിലെ തൊണ്ടുമുതലുകളാണ് ഈ മുറിയിൽ സൂക്ഷിച്ചിരുന്നത്.അബ്കാരി കേസുകളിൽ പിടിക്കപ്പെട്ട നാടൻ ചാരായവും വിദേശമദ്യവും ഇക്കൂട്ടത്തിലുണ്ടായിരുന്നു. പൂട്ട് തകർത്ത് അകത്തുകയറിയ മോഷ്ടാവ് കന്നാസുകൾ ഉൾപ്പെടെയാണ് എടുത്തുകൊണ്ടുപോയത്. ഇതിനുശേഷം പയ്യന്നൂർ പുതിയ ബസ്‌സ്റ്റാൻഡ് പരിസരത്ത് അടിപിടി നടക്കുന്നതറിഞ്ഞെത്തിയ പോലീസാണ് രാജനെ പിടികൂടിയത്.പരസ്യമദ്യപാനത്തിന് കേസെടുക്കാൻ എത്തിയ പോലീസ് ഇവരുടെ കയ്യിൽ നിന്നും 15 കുപ്പി മദ്യം പിടിച്ചെടുത്തു. പോലീസ് ഇയാളെ കൂടുതൽ ചോദ്യംചെയ്തപ്പോഴാണ് കോടതിയിൽ തൊണ്ടിമുതലായി സൂക്ഷിച്ചുവച്ചിരുന്ന മദ്യമാണ് ഇയാളും കൂട്ടാളികളും കുടിച്ചു പ്രശ്നമുണ്ടാക്കിയതെന്ന് മനസിലായത്.ഇയാളെ കോടതി രണ്ടാഴ്ചത്തേക്ക് റിമാൻഡ് ചെയ്തു.പിന്നീടാണ് മന്മഥനെ പിടികൂടിയത്.

പാപ്പിനിശ്ശേരി:പാപ്പിനിശ്ശേരി ശിവ ക്ഷേത്രത്തിൽ കവർച്ച.ചുറ്റമ്പലത്തിനുള്ളിൽ കടന്ന മോഷ്ട്ടാവ് സ്റ്റീൽ ഭണ്ഡാരം തകർത്ത് പണം കവർന്നു.ക്ഷേത്രം ഓഫീസ് മുറിയുടെ പൂട്ട് തകർത്ത് മേശയിൽ സൂക്ഷിച്ചിരുന്ന 3500 രൂപയും കവർന്നു.ബുധനാഴ്ച രാവിലെ ക്ഷേത്രത്തിലെത്തിയ പൂജാരിയാണ് കവർച്ച നടന്നതായി കണ്ടെത്തിയത്.ചുറ്റമ്പലത്തിലേക്ക് കടക്കുന്നതിനു മൂന്നു വാതിലുകൾ ഉണ്ടെങ്കിലും അതൊന്നും തകർക്കാതെയാണ് മോഷ്ട്ടാക്കൾ അകത്തു കടന്നത്. ചുറ്റമ്പലത്തിന്റെ മേൽക്കൂര തകർത്താണ് അകത്തുകടന്നതെന്നാണ് സംശയിക്കുന്നത്. വളപട്ടണം എസ്‌ഐ ശ്രീജിത്ത് കോടേരിയും സംഘവും സ്ഥലത്തെത്തി പ്രാഥമികാന്വേഷണം നടത്തി.രണ്ടുവർഷം മുൻപും ക്ഷേത്രത്തിൽ മൂന്നു തവണ കവർച്ച നടന്നിരുന്നു.

മട്ടന്നൂർ:മഴ മാറിയതോടെ കണ്ണൂർ വിമാനത്താവളത്തിന്റെ നിർമാണ പ്രവർത്തികൾ വേഗത്തിലായി.ഈ വർഷം അവസാനത്തോടെ പണികൾ കഴിയുന്നത്ര പൂർത്തീകരിക്കാനാണ് ലക്ഷ്യമിടുന്നത്.മഴ,ദീപാവലി എന്നിവയെ തുടർന്ന് നാട്ടിലേക്ക് പോയ മറുനാടൻ തൊഴിലാളികൾ മിക്കവരും തിരിച്ചെത്തിയിട്ടുണ്ട്.മഴമൂലം മാറ്റിവെച്ച റൺവെ സുരക്ഷാ മേഖലയുടെയും സുരക്ഷാ മതിലിന്റെയും നിർമാണം ഉടൻ ആരംഭിക്കും.ടെർമിനൽ കെട്ടിടത്തിന്റെ അകത്തള ജോലി ഏതാണ്ട് പൂർത്തിയായി.മാർച്ചോടെ മുഴുവൻ പണികളും പൂർത്തിയാകും.പദ്ധതി പ്രദേശത്തെ അനുബന്ധ റോഡുകളുടെയും ചുറ്റുമതിലിന്റെയും നിർമാണം അവസാന ഘട്ടത്തിലാണ്.റൺവെ സുരക്ഷാ മേഖലയുടെ നിർമാണം ജനുവരിയിൽ പൂർത്തിയാക്കും.എയർ കാർഗോ കോംപ്ലക്സ്,സിഐഎസ്എഫ് കെട്ടിടം,കിയാൽ ഓഫീസ് കോംപ്ലക്സ്,അനുബന്ധ ലൈറ്റിംഗ് സംവിധാനം എന്നിവയുടെ നിർമാണത്തിനുള്ള ടെൻഡർ നടപടി അവസാനഘട്ടത്തിലാണ്. വിമാനത്താവളത്തോടനുബന്ധിച്ചുള്ള കാർ പാർക്കിങ്,ഡ്യൂട്ടി ഫ്രീ ഷോപ്പുകൾ,മൾട്ടിപ്ലെക്സ്,വൈ ഫൈ എന്നിവയ്ക്കായുള്ള ടെണ്ടർ നടപടികളും ആരംഭിച്ചു. വിമാനത്താവളത്തിന്റെ സമീപന ലൈറ്റ് സ്ഥാപിക്കുന്നതിനായി കല്ലേരിക്കര,പറോപ്പൊയിൽ എന്നിവിടങ്ങളിൽ 7.5 ഏക്കർ സ്ഥലം ഏറ്റെടുക്കും.