കൊച്ചി:നടിയെ ആക്രമിച്ച കേസിൽ ജാമ്യം ലഭിച്ചതിനു തൊട്ടുപിന്നാലെ തീയേറ്റർ ഉടമകളുടെ സംഘടനായ ഫിലിം എക്സിബിറ്റേഴ്സ് യുണൈറ്റഡ് ഓർഗനൈസേഷൻ ഓഫ് കേരളയുടെ(ഫ്യുയോക്) പ്രസിഡന്റായി ദിലീപിനെ വീണ്ടും തിരഞ്ഞെടുത്തു.കൊച്ചിയിൽ നടന്ന യോഗത്തിലാണ് ദിലീപിനെ വീണ്ടും പ്രസിഡന്റായി തിരഞ്ഞെടുത്തത്.കേസിൽ ദിലീപ് അറസ്റ്റിലായതിനെ തുടർന്ന് അദ്ദേഹത്തെ പ്രസിഡണ്ട് സ്ഥാനത്ത് നിന്നും ഒഴിവാക്കുകയും പകരം വൈസ് പ്രസിഡന്റായിരുന്ന ആന്റണി പെരുമ്പാവൂരിലെ പ്രസിഡന്റായി തിരഞ്ഞെടുക്കുകയും ചെയ്തിരുന്നു.ദിലീപിനെ സംഘടനയിൽ നിന്നും പുറത്താക്കിയിട്ടില്ലെന്നും തീരുമാനം ദിലീപിനെ ഉടൻ അറിയിക്കുമെന്നും ആന്റണി പെരുമ്പാവൂർ പറഞ്ഞു.ആന്റണി പെരുമ്പാവൂർ വൈസ് പ്രസിഡന്റായി തുടരും.സംഘടനയുടെ പ്രവർത്തനത്തിൽ ദിലീപ് വേണമെന്ന് തങ്ങൾ ആഗ്രഹിക്കുന്നുണ്ടെന്നും അതിനാലാണ് ദിലീപിനെ തിരികെ എടുത്തതെന്നും ഫിയോക് ഭാരവാഹികൾ വാർത്ത സമ്മേളനത്തിൽ പറഞ്ഞു.
