October 2017

തളിപ്പറമ്പ്:കണ്ണൂർ ജില്ലാ സഹകരണ ബാങ്ക് തളിപ്പറമ്പ് ശാഖയിൽ നടന്ന മുക്കുപണ്ട തട്ടിപ്പിൽ കാണാതായ പണയാഭരണങ്ങൾ പോലീസ് കണ്ടെടുത്തു.മറ്റു സഹകരണ ബാങ്കുകളിൽ നിന്നാണ് ഇവ കണ്ടെടുത്തത്.കണ്ണപുരം സർവീസ് സഹകരണ ബാങ്കിന്റെ കതിരുവെയ്ക്കുംതറ ബ്രാഞ്ച്,പട്ടുവം സർവീസ് സഹകരണ ബാങ്കിന്റെ വെള്ളിക്കീൽ ബ്രാഞ്ച് എന്നിവിടങ്ങളിൽ നിന്നാണ് കൂടുതൽ ആഭരണങ്ങളും കണ്ടെടുത്തത്.മുഖ്യപ്രതി രമയുടെ പേരിലാണ് സ്വർണാഭരണങ്ങൾ.കോടതിയിൽ നിന്നും കസ്റ്റഡിയിൽ വാങ്ങിയ പ്രതിയെയും കൊണ്ട് പോലീസ് ഇന്നലെ തെളിവെടുപ്പ് ആരംഭിച്ചിരുന്നു.തളിപ്പറമ്പ് ശാഖയിൽ സ്വർണം പണയപ്പെടുത്തിയവരെയും കൂട്ടിയാണ് പോലീസ് മറ്റു ബാങ്കുകളിൽ തെളിവെടുപ്പിനായി പോയത്.14 പേരുടെ  ആഭരണങ്ങൾ കണ്ണപുരം,വെള്ളിക്കീൽ ബാങ്കുകളിൽ നിന്നും കണ്ടെടുത്തു.ഒന്നേമുക്കാൽ കിലോയോളം തൂക്കം വരുന്ന സ്വർണാഭരണങ്ങൾ വിവിധ ബാങ്കുകളിൽ നിന്നായി പോലീസ് കണ്ടെടുത്തു.കണ്ണപുരം,വെള്ളിക്കീൽ ബ്രാഞ്ചുകളിൽ നിന്നായി 14 ലക്ഷം രൂപ വീതം ആഭരണത്തിൽ വായ്‌പ്പാ വാങ്ങിയതായി കണ്ടെത്തിയിട്ടുണ്ട്. കൂടാതെ മുഖ്യപ്രതിയായ അസിസ്റ്റൻഡ് മാനേജർ രമ തളിപ്പറമ്പ് ബ്രാഞ്ചിൽ മറ്റുള്ളവരുടെ ആഭരണം സ്വന്തം പേരിൽ പണയപ്പെടുത്തിയതായും പോലീസ് പറഞ്ഞു.പ്രതികളെ തിങ്കളാഴ്ച്ച കോടതിയിൽ ഹാജരാക്കും.

പിണറായി:പിണറായി എകെജി സ്മാരക ഹയർ സെക്കണ്ടറി സ്കൂളിന്റെ പുതിയ കെട്ടിടം മുഖ്യമന്ത്രി പിണറായി വിജയൻ ഉൽഘാടനം ചെയ്തു.ആധുനിക രീതിയിൽ സജ്ജീകരിച്ച 13 ക്ലാസ് മുറികളും രണ്ട് കമ്പ്യൂട്ടർ ലാബുകളും രണ്ട് ഓഫീസ് മുറികളുമാണ് പുതിയ കെട്ടിടത്തിലുള്ളത്. ബിപിസിഎൽ നൽകിയ സ്കൂൾ ബസിന്റെ താക്കോൽദാനവും പുതുതായി ആരംഭിച്ച സ്റ്റുഡന്റ് പോലീസ് കേഡറ്റ് പ്രൊജക്റ്റിന്റെ ഉൽഘാടനവും മുഖ്യമന്ത്രി നിർവഹിച്ചു.ലോകത്തിലെ വികസിത രാജ്യങ്ങളിലെ കുട്ടികളോട് കിടപിടിക്കാനാകത്തക്കവണ്ണം നമ്മുടെ കുട്ടികളെ പ്രാപ്തരാക്കുക എന്നതാണ് പൊതു വിദ്യാലയങ്ങൾ ശക്തിപ്പെടുത്താനുള്ള പരിപാടികളിലൂടെ സർക്കാർ ലക്‌ഷ്യം വെയ്ക്കുന്നതെന്നു മുഖ്യമന്ത്രി പറഞ്ഞു.പൊതു വിദ്യാലയ സംരക്ഷണ പ്രവർത്തനങ്ങളിൽ ഭാഗമാകുന്ന ഓരോരുത്തരും വരും തലമുറകൾക്ക് വേണ്ടിയുള്ള നിക്ഷേപമാണ് നടത്തുന്നതെന്നും മുഖ്യമന്ത്രി വ്യക്തമാക്കി.വിദ്യാഭ്യാസ മന്ത്രി പ്രൊഫ.സി.രവീന്ദ്രനാഥ് അധ്യക്ഷത വഹിച്ചു.പി.കെ ശ്രീമതി എം.പി,ബ്ലോക്ക് പഞ്ചായത്ത് പ്രസിഡന്റ് കെ.കെ രാജീവൻ,ഗ്രാമപഞ്ചായത്ത് പ്രസിഡന്റ് പി.കെ ഗീതമ്മ,പി.ബാലൻ,വി.എ നാരായണൻ,സി.എൻ ചന്ദ്രൻ,കക്കോത്ത് രാജൻ,കെ.കെ പ്രദീപൻ,പ്രിൻസിപ്പൽ ആർ.ഉഷാനന്ദിനി തുടങ്ങിയവർ ചടങ്ങിൽ പങ്കെടുത്തു.

വടകര: കോഴിക്കോട് വടകരയില്‍ കെഎസ്ആര്‍ടിസി ബസിടിച്ച് ബൈക്ക് യാത്രക്കാരായ മൂന്ന് പേര്‍ മരിച്ചു.ശനിയാഴ്ച രാത്രിയില്‍ ദേശീയപാത മുട്ടുങ്ങല്‍ കെഎസ്ഇബി ഓഫീസിന് സമീപമാണ് അപകടമുണ്ടായത്. മരിച്ചവരിൽ രണ്ടു പേരെ തിരിച്ചറിഞ്ഞു. കൊയിലാണ്ടി കുറ്റിയാടിനിലയംകുനി ശ്രീജിത്ത് (21), കൊയിലാണ്ടി സ്വദേശി അനന്തു എന്നിവരാണ് മരിച്ചത്. മൃതദേഹങ്ങള്‍ വടകര സര്‍ക്കാര്‍ ആശുപത്രിയില്‍ സൂക്ഷിച്ചിരിക്കുകയാണ്.