കോട്ടയം:കോട്ടയം വഴിയുള്ള ട്രെയിൻ ഗതാഗതം തടസപ്പെട്ടു.കോട്ടയത്തിനും ഏറ്റൂമാനൂരിനും ഇടയിൽ പാലം പണി നടക്കുന്നതിനാലാണ് ഗതാഗതം തടസ്സപ്പെട്ടിരിക്കുന്നതെന്നാണ് റെയിൽവേ അധികൃതർ നൽകുന്ന വിശദീകരണം.വൈകാതെ സർവീസ് പുനഃസ്ഥാപിക്കാൻ കഴിയുമെന്നാണ് അധികൃതർ പറയുന്നത്.ദീർഘദൂര ട്രെയിനുകൾ പോലും മുന്നറിയിപ്പില്ലാതെ പിടിച്ചിട്ടിരിക്കുകയാണ്.മുൻകൂട്ടി അറിയിക്കാതെ റയിൽവെയുടെ നടപടിക്കെതിരെ കടുത്ത പ്രതിഷേധമാണ് ഉയരുന്നത്.
വിതുര:കെ.എസ് ശബരീനാഥൻ എംഎൽഎയുടെ കാറിനു നേരെ ആക്രമണം.ഇന്ന് ഉച്ചയ്ക്ക് വിതുര ജംഗ്ഷനിൽ വെച്ചാണ് ആക്രമണം ഉണ്ടായത്.സംഭവത്തിൽ പെരിങ്ങമ്മല സ്വദേശിയായ സിദ്ദിഖിനെ പോലീസ് പിടികൂടി.ഇയാൾ മനസികരോഗിയാണെന്നു പോലീസ് അറിയിച്ചു. വിതുരയിൽ ഒരു കൺവെൻഷനിൽ പങ്കെടുക്കാൻ എത്തിയ ശബരീനാഥ് ഉച്ചയ്ക്ക് ഊണ് കഴിച്ചുകൊണ്ടിരുന്നപ്പോൾ പുറത്തു പാർക്ക് ചെയ്തിരുന്ന കാർ സിദ്ധിക്ക് അടിച്ചു തകർക്കുകയായിരുന്നു. കാറിന്റെ ഗ്ലാസുകൾ തകർന്നു.ഇയാളെ നാട്ടുകാർ ഇടപെട്ട് പോലീസിൽ ഏൽപ്പിക്കുകയായിരുന്നു.മാനസിക രോഗ ചികിത്സയ്ക്കായി ആശുപത്രിയിൽ എത്തിച്ച് തിരിച്ചു വരും വഴി ഇയാൾ ബന്ധുക്കളുടെ പിടിയിൽ നിന്നും രക്ഷപെട്ട് ഓടുകയായിരുന്നു.
അലഹബാദ്:പ്രമാദമായ ആരുഷി കൊലക്കേസിൽ മാതാപിതാക്കളെ കുറ്റവിമുക്തരാക്കി. അലഹബാദ് ഹൈക്കോടതിയുടേതാണ് വിധി.കേസിൽ ആരുഷിയുടെ മാതാപിതാക്കളെ സിബിഐ കുറ്റക്കാരായി പ്രഖ്യാപിച്ചിരുന്നു.ഇതിനെതിരെ ആരുഷിയുടെ മാതാപിതാക്കളായ രാജേഷ് തൽവാറും നൂപുർ തൽവാറും നൽകിയ അപ്പീലിലാണ് വിധി.2013 ഇൽ ആരുഷിയുടെ മാതാപിതാക്കളെ കുറ്റക്കാരാക്കി ഗാസിയാബാദ് പ്രത്യേക കോടതി ജീവപര്യന്തം തടവ് ശിക്ഷ വിധിച്ചിരുന്നു. 2008 മെയിലാണ് 14 കാരിയായ ആരുഷിയെ കിടപ്പുമുറിയിൽ കൊല്ലപ്പെട്ട നിലയിൽ കണ്ടെത്തിയത്.തൊട്ടടുത്ത ദിവസം തന്നെ വീട്ടുവേലക്കാരനായ ഹേംരാജിന്റെ മൃതദേഹവും വീട്ടിലെ ടെറസിൽ കണ്ടെത്തുകയായിരുന്നു.മകളും വീട്ടുവേലക്കാരനും തമ്മിലുള്ള അവിഹിത ബന്ധം അറിഞ്ഞ പിതാവ് ആരുഷിയെയും വേലക്കാരൻ ഹേംരാജിനെയും കൊലപ്പെടുത്തി എന്നതായിരുന്നു കേസ്.
മുംബൈ:എസ് ബി ഐ യിൽ ലയിച്ച അസ്സോസിയേറ്റ് ബാങ്കുകളുടെ ചെക്ക് ബുക്കുകളുടെ കാലാവധി നീട്ടി.ഡിസംബർ 31 വരെയാണ് കാലാവധി നീട്ടിയിരിക്കുന്നത്.നേരത്തെ സെപ്റ്റംബർ 30 വരെ ആയിരുന്നു അസ്സോസിയേറ്റ് ബാങ്കുകളുടെ ചെക്ക് ബുക്കുകളുടെ കാലാവധി.പുതിയ ചെക്ക് ബുക്കുകൾക്ക് എത്രയും വേഗം അപേക്ഷിക്കണമെന്നു എസ് ബി ഐ ഉപഭോക്താക്കളോട് ആവശ്യപ്പെട്ടിരുന്നു.എന്നാൽ പലർക്കും പുതിയ ചെക്ക് ബുക്കുകൾ ലഭിച്ചിരുന്നില്ല.ഇതേ തുടർന്നാണ് എസ്ബിഐ കാലാവധി നീട്ടിയത്.ഓൺലൈൻ,മൊബൈൽ ബാങ്കിങ്,എടിഎം എന്നിവ വഴി ചെക്ക് ബുക്കുകൾക്ക് അപേക്ഷിക്കാം.
കോഴിക്കോട്:കോഴിക്കോട് രണ്ട് അന്യസംസ്ഥാന തൊഴിലാളികൾക്ക് കോളറ സ്ഥിതീകരിച്ചു. ഇവരെ കോഴിക്കോട് മെഡിക്കല്‍ കോളേജ് ആശുപത്രിയിൽ പ്രവേശിപ്പിച്ചു.പശ്ചിമ ബംഗാളില്‍നിന്നും ഒരാഴ്ച്ച മുമ്പ് വന്ന തൊഴിലാളികള്‍ക്കാണ് കോളറ പിടിപെട്ടത്.വയറിളക്കം മൂലം ആശുപത്രിയില്‍ പ്രവേശിപ്പിച്ചവര്‍ക്കാണ് കോളറ സ്ഥിരീകരിച്ചത്. മാവൂരില്‍ നേരത്തെ ഇതരസംസ്ഥാന തൊഴിലാളികള്‍ക്ക് കോളറ പിടിപെട്ടിരുന്നു. മിഠായി തെരുവിലും, നരികുനിയിലും താമസിക്കുന്ന ഇതര സംസ്ഥാന തൊഴിലാളികള്‍ക്കാണ് കോളറ പിടിപെട്ടത്. പുതുതായി കോളറ സ്ഥിരീകരിച്ച സാഹചര്യത്തില്‍ പരിശോധനകള്‍ ശക്തമാക്കുമെന്ന് ജില്ലാ മെഡിക്കല്‍ ഓഫീസര്‍ പറഞ്ഞു.
കേളകം:കൃഷിയിടത്തിൽ ജോലിചെയ്യുകയായിരുന്ന യുവതിക്ക് കാട്ടുപന്നിയുടെ ആക്രമണത്തിൽ പരിക്ക്.കേളകം തുള്ളൽ സ്വദേശി മണലുമാലിൽ രവിയുടെ ഭാര്യ ഷീബ ( 39)യ്ക്കാണ് പരിക്കേറ്റത്.ഇന്നലെ ഉച്ചയ്ക്ക് 12 ഓടെയായിരുന്നു സംഭവം. തുള്ളലിലെ സ്വകാര്യവ്യക്തിയുടെ കൃഷിയിടത്തിൽ തൊഴിലുറപ്പ് പദ്ധതി പ്രകാരം ഷീബയുൾപ്പെടെ നാലുപേരടങ്ങുന്ന സംഘം നീർക്കുഴി കുഴിക്കുന്നതിനിടെ പൊന്തക്കാട്ടിൽനിന്നും ഓടിയെത്തിയ കാട്ടുപന്നി ഷീബയെ കുത്തിവീഴ്ത്തുകയായിരുന്നു. മറ്റുള്ളവർ ബഹളംവച്ച് പന്നിയെ പിന്നീട് തുരത്തി.ആറളം വന്യജീവി സങ്കേതത്തിൽനിന്നാണ് വന്യജീവികൾ നാട്ടിലേക്കിറങ്ങുന്നത്. ആറളം വന്യജീവി സങ്കേതത്തിന്‍റെ അതിർത്തിമേഖലയിൽ കാട്ടുപന്നിശല്യം രൂക്ഷമാണ്.കൃഷിയിടങ്ങളിൽ എത്തുന്ന കാട്ടുപന്നികളെ വെടിവച്ചു കൊല്ലാൻ സർക്കാർ അനുവദിച്ചെങ്കിലും ഇതു നടപ്പാക്കാൻ വനംവകുപ്പ് തയാറാകുന്നില്ലെന്ന് നാട്ടുകാർക്ക് പരാതിയുണ്ട്.
കണ്ണൂര്‍: കേന്ദ്ര-സംസ്ഥാന സര്‍ക്കാരുകളുടെ ജനദ്രോഹ നടപടികൾക്കെതിരെ പ്രതിപക്ഷ നേതാവ് രമേശ് ചെന്നിത്തല നയിക്കുന്ന ‘പടയൊരുക്കം’ കണ്ണൂര്‍ ജില്ലയില്‍ മൂന്നു ദിവസങ്ങളിൽ പര്യടനം നടത്തുമെന്ന് യുഡിഎഫ് ജില്ലാ ചെയര്‍മാന്‍ പ്രഫ.എ.ഡി.മുസ്തഫ അറിയിച്ചു.നവംബര്‍ രണ്ടു മുതല്‍ നാലു വരെയാണു ജില്ലയിലെ പര്യടനം.രണ്ടിനു വൈകുന്നേരം അഞ്ചു മണിക്ക് പയ്യന്നൂര്‍, ആറുമണിക്ക് തളിപ്പറമ്പ് എന്നിവിടങ്ങളില്‍ സ്വീകരണം നല്‍കും. മൂന്നിനു രാവിലെ പത്തുമണിക്ക് കല്യാശേരി മണ്ഡലത്തിലെ പഴയങ്ങാടിയിലും ഉച്ചകഴിഞ്ഞു മൂന്നു മണിക്ക് ധര്‍മടം മണ്ഡലത്തിലെ ചക്കരക്കല്ലിലും നാലുമണിക്ക് തലശ്ശേരിയിലും സ്വീകരണം നൽകും.വൈകുന്നേരം അഞ്ചുമണിക്ക് കണ്ണൂര്‍, അഴീക്കോട് മണ്ഡലങ്ങളുടെ സംയുക്തസ്വീകരണം കണ്ണൂരിലും നടക്കും.നാലാം തീയതി രാവിലെ 11ന് ഇരിക്കൂര്‍ മണ്ഡലത്തിലെ സ്വീകരണസമ്മേളനം ശ്രീകണ്ഠപുരത്തും ഉച്ചകഴിഞ്ഞു മൂന്നിന് പേരാവൂര്‍ മണ്ഡലത്തിലെ സ്വീകരണം ഇരിട്ടിയിലും നടക്കും. വൈകുന്നേരം നാലിന് മട്ടന്നൂരിലും അഞ്ചുമണിക്ക് കൂത്തുപറമ്പിലും നല്‍കുന്ന സ്വീകരണത്തിനുശേഷം യാത്ര വയനാട് ജില്ലയിലേക്ക് കടക്കും.
കണ്ണൂർ: കുറുവ അവേരയിൽ ബിജെപി പ്രവർത്തകന്റെ വീടിനു നേരെ ആക്രമണം.മറ്റൊരു പ്രവർത്തകന്റെ സ്കൂട്ടർ തകർത്തു.അവേര കോളനിയിൽ ഇന്നു പുലർച്ചെ 1.30 ഓടെയായിരുന്നു സംഭവം. ബിജെപി പ്രവർത്തകനായ ഹരീഷ് ബാബുവിന്‍റെ വീടിനു നേരേയാണ് ആക്രമണം നടന്നത്. കല്ലേറിൽ വീടിന്‍റെ രണ്ടു ജനൽ ചില്ലുകൾ തകർന്നു. കോളനിയിലെ വീടിനു മുന്നിൽ നിർത്തിയിട്ടിരുന്ന സ്കൂട്ടറിന്‍റെ സീറ്റ് കുത്തികീറിയ നിലയിലാണ്. അക്രമത്തിനു പിന്നിൽ സിപിഎമ്മാണെന്നു ബിജെപി ആരോപിച്ചു.ബിജെപി ജില്ലാ നേതാക്കൾ സ്ഥലം സന്ദർശിച്ചു.സംഭവത്തിൽ ഇന്നു വൈകുന്നേരം പ്രതിഷേധം സംഘടിപ്പിക്കുമെന്ന് നേതാക്കൾ പറഞ്ഞു.സിറ്റി പോലീസ് സ്ഥലത്തെത്തി പരിശോധന നടത്തി.
മാഹി:മാഹി സെന്റ് തെരേസാസ് പള്ളി പെരുന്നാളിന്റെ പ്രധാന ദിനങ്ങളായ 14,15 തീയതികളിൽ മാഹിയിൽ ഗതാഗത നിയന്ത്രണം ഏർപ്പെടുത്തും.തലശ്ശേരി ഭാഗത്തു നിന്നും വരുന്ന വാഹനങ്ങൾ മാഹി സെമിത്തേരി റോഡ് വഴി എ.കെ കുമാരൻ മാസ്റ്റർ റോഡ്,മാഹി റെയിൽവേ സ്റ്റേഷൻ റോഡ് വഴി അഴിയൂർ ചുങ്കത്തെ ദേശീയ പാതയിലെത്തണം.വടകരയിൽ നിന്നും കണ്ണൂർ ഭാഗത്തേക്ക് പോകുന്ന മുഴുവൻ വാഹനങ്ങളും മാഹി ആശുപത്രി ജംഗ്ഷനിൽ നിന്നും ഇടത്തോട്ട് തിരിഞ്ഞ് താഴങ്ങാടി,ടാഗോർ പാർക്ക് വഴി ദേശീയ പാതയിലേക്ക് പ്രവേശിക്കണം.ഈ ദിവസങ്ങളിൽ മാഹി ആസ്പത്രി കവല മുതൽ സെമിത്തേരി റോഡ് ജംഗ്ഷൻ വരെ വാഹനഗതാഗതം നിരോധിച്ചിട്ടുണ്ട്.ഇതേ ദിവസം മാഹി ടൗണിലുള്ള മുഴുവൻ മദ്യശാലകളും അടച്ചിടാനും നിർദേശമുണ്ട്.പോക്കറ്റടി,മോഷണം എന്നിവ തടയുന്നതിന് എസ്പിയുടെ നേതൃത്വത്തിൽ സ്പെഷ്യൽ ഷാഡോ ടീം പ്രവർത്തിക്കുന്നുണ്ട്.ക്രമസമാധാന പാലനത്തിനും ട്രാഫിക്ക് നിയന്ത്രണത്തിനുമായി പുതുച്ചേരിയിൽ നിന്നും പ്രത്യേക സേനാംഗങ്ങളെ എത്തിക്കും.കൂടാതെ കണ്ണൂരിൽ നിന്നും ബോംബ് സ്‌ക്വാഡ്,ഡോഗ് സ്‌ക്വാഡ് എന്നിവയുടെ സേവനവും ലഭ്യമാക്കും.
കുമ്പള:വിദേശത്തുള്ള സുഹൃത്തിന് നല്കാൻ പലഹാരമെന്ന വ്യാജേന കഞ്ചാവ് കൊടുത്തയച്ച കേസിൽ യുവാവ് അറസ്റ്റിൽ.കൊടിയമ്മയിലെ ബന്തിന്റടി വീട്ടിൽ സൂപ്പിയെയാണ്(36) കുമ്പള എസ്‌ഐയും സംഘവും അറസ്റ്റ് ചെയ്തത്.ഒന്നര വർഷം മുൻപാണ് കേസിനാസ്പദമായ സംഭവം.ആദ്യമായി ഖത്തറിലേക്ക് പോവുകയായിരുന്ന കൊടിയമ്മയിലെ മുഹമ്മദ് ഷെരീഫ് എന്നയാളുടെ കയ്യിൽ സുഹൃത്തിനു കൊടുക്കാനുള്ള പലഹാരം എന്ന വ്യാജേന സൂപ്പി കഞ്ചാവ് കൊടുത്തയക്കുകയായിരുന്നു.ഖത്തറിലെത്തിയ ഷെരീഫിനെ വിമാനത്താവളത്തിൽ കസ്റ്റംസ് ഉദ്യോഗസ്ഥർ പിടികൂടുകയായിരുന്നു.നാല് കിലോഗ്രാം കഞ്ചാവാണ് ഇയാളിൽ നിന്നും കണ്ടെടുത്തത്.അതിനു ശേഷം ഖത്തറിലെ ജയിലിൽ തടവ് ശിക്ഷ അനുഭവിച്ചു വരികയാണ് ഷെരീഫ്.ഷെരീഫിന്റെ ഭാര്യ മുംതാസ് കുമ്പള പോലീസിൽ നൽകിയ പരാതിയുടെ അടിസ്ഥാനത്തിലാണ് സൂപ്പിയെ പോലീസ് അറസ്റ്റ് ചെയ്തത്.മൂന്നാളുകൾ ചേർന്നാണ് തന്റെ ഭർത്താവിനെ കുടുക്കിയതെന്നാണ് മുംതാസിന്റെ പരാതി.മറ്റു രണ്ടുപേരെ ഉടൻ പിടികൂടാനാകുമെന്നാണ് പോലീസ് പറയുന്നത്.