October 2017

തലശ്ശേരി:മുലപ്പാൽ തൊണ്ടയിൽ കുടുങ്ങി മൂന്നു ദിവസം പ്രായമുള്ള കുഞ്ഞ് മരിച്ചു.തലശ്ശേരി പെട്ടിപ്പാലം കോളനിയിലെ നാസർ-മുർഷീന ദമ്പതികളുടെ കുഞ്ഞാണ് മരിച്ചത്.വ്യാഴാഴ്ചയാണ് കുഞ്ഞ് ജനിച്ചത്.ശനിയാഴ്ച ഉച്ചയോടെയാണ് അമ്മയും കുഞ്ഞും വീട്ടിലെത്തിയത്.ഞായറാഴ്ച രാവിലെയാണ് കുഞ്ഞിന് ചലനമില്ലാത്തതു രക്ഷിതാക്കൾ കണ്ടത്.ആശുപത്രിയിൽ എത്തിക്കുന്നതിന് മുൻപേ തന്നെ  മരണം സംഭവിച്ചതിനാൽ മൃതദേഹ പരിശോധന നടത്തിയതിനു ശേഷമേ മൃതദേഹം വിട്ടുതരാൻ കഴിയുകയുള്ളൂ എന്ന് ആശുപത്രി അധികൃതർ അറിയിച്ചു.എന്നാൽ പരാതിയില്ലെന്നും മൃതദേഹ പരിശോധന നടത്തേണ്ടെന്നും രക്ഷിതാക്കൾ എഴുതി നൽകിയിട്ടും ആശുപത്രി അധികൃതർ സമ്മതിച്ചില്ല.മൃതദേഹ പരിശോധന നടത്തുകയാണെങ്കിൽ മൃതദേഹം സ്വീകരിക്കില്ല എന്ന് കുട്ടിയുടെ ബന്ധുക്കൾ പോലീസിനെ അറിയിച്ചു.തുടർന്ന് പോലീസ് ആശുപത്രി അധികൃതരുമായി സംസാരിക്കുകയും മൃതദേഹം വിട്ടുനൽകുകയും ചെയ്തു.

ഇടുക്കി: തമിഴ്നാട്ടിലെ മുന്തലിൽ രണ്ടു മലയാളി യുവാക്കൾ വെട്ടേറ്റ് മരിച്ചു.മൂന്നാർ എല്ലപ്പെട്ടി സ്വദേശികളായ ജോൺപീറ്റർ (19), ശരവണൻ (18) എന്നിവരാണ് മരിച്ചത്. തമിഴ്നാട്ടിൽ നിരവധി കൊലക്കേസിൽ പ്രതിയായ മണി എന്നയാളാണ് യുവാക്കളെ കൊലപ്പെടുത്തിയതെന്നാണ് സൂചന. ഇയാൾക്കായി പോലീസ് തെരച്ചിൽ ആരംഭിച്ചിട്ടുണ്ട്.ഓട്ടോ ഡ്രൈവർമാരാണ് മരിച്ച ജോൺ പീറ്ററും ശരവണനും. തമിഴ്നാട്ടിലേക്ക് ഓട്ടം പോകുന്നു എന്ന് പറഞ്ഞാണ് ജോൺ പീറ്റർ ശനിയാഴ്ച രാത്രി 8.30 ഓടെ വീട്ടിൽ നിന്നും പോയത്. ദൂരത്തേയ്ക്കുള്ള ഓട്ടമായതിനാൽ സുഹൃത്തായ ശ്രാവണിനെ ഒപ്പം കൂട്ടുകയായിരുന്നു. കൊലപാതകത്തിന്‍റെ കാരണം വ്യക്തമായിട്ടില്ല.പ്രതിയെന്ന് സംശയിക്കുന്ന മണി മറ്റൊരു കേസിൽ ജയിലിലായിരുന്നു. ഇയാൾ കഴിഞ്ഞ ദിവസം ജാമ്യത്തിലിറങ്ങിയിരുന്നുവെന്നും സംഭവം നടക്കുമ്പോൾ സ്ഥലത്തുണ്ടായിരുന്നുവെന്നും റിപ്പോർട്ടുകളുണ്ട്.പോലീസ് അന്വേഷണം തുടരുകയാണ്.

കോഴിക്കോട്:ബേപ്പൂർ തുറമുഖത്ത് കപ്പലിടിച്ച് മറിഞ്ഞ മൽസ്യബന്ധന ബോട്ടിൽ നിന്നും കാണാതായവർക്കായുള്ള തിരച്ചതിൽ നിർത്തി.നാലുപേരെയാണ് കാണാതായിരുന്നത്.ഇതിൽ രണ്ടുപേരുടെ മൃതദേഹം കഴിഞ്ഞ ദിവസം കണ്ടെത്തിയിരുന്നു.തമിഴ്നാട് കൊളച്ചൽ സ്വദേശിയായ ബോട്ടുടമ ആന്റോ,തിരുവനന്തപുരം സ്വദേശി പ്രിൻസ് എന്നിവരുടെ മൃതദേഹങ്ങളാണ് കണ്ടെടുത്തത്.തിരുവനന്തപുരം സ്വദേശിയായ ജോൺസൻ,തമിഴ്നാട് കൊളച്ചൽ സ്വദേശി രമ്യാസ് എന്നിവരെയാണ് ഇനി കണ്ടെത്താനുള്ളത്.കോസ്റ്റ് ഗാർഡും നാവികസേനയും മൂന്നു ദിവസമായി തിരച്ചിൽ നടത്തുന്നുണ്ടെങ്കിലും ഇവരെ കണ്ടെത്താനായിട്ടില്ല.ഇതിനെ തുടർന്നാണ് തിരച്ചിൽ അവസാനിപ്പിക്കുന്നത്.കോസ്റ്റ് ഗാർഡ് ഹെലിക്കോപ്റ്റർ നടത്തുന്ന പതിവ് നിരീക്ഷണം മാത്രമാണ് ഇനി ഉണ്ടാകുക.എന്നാൽ കന്യാകുമാരിയിൽ നിന്നുള്ള മൽസ്യത്തൊഴിലാളികൾ ഇപ്പോഴും തിരച്ചിൽ തുടരുന്നുണ്ട്.ബുധനാഴ്ച രാത്രി എട്ടുമണിയോടെയാണ് ബേപ്പൂർ തുറമുഖത്തു നിന്നും 50 നോട്ടിക്കൽ മൈൽ അകലെ ബോട്ട് അപകടത്തിൽപെട്ടത്.കൊച്ചി ഹാർബറിൽ നിന്നും മത്സ്യബന്ധനത്തിനായി പുറപ്പെട്ട ഇമ്മാനുവേൽ എന്ന ബോട്ട് അജ്ഞാത കപ്പൽ ഇടിച്ചു തകരുകയായിരുന്നു.