October 2017

തിരുവനന്തപുരം: കണ്ണൂര്‍ മെഡിക്കല്‍ കോളേജില്‍ കഴിഞ്ഞവര്‍ഷം പ്രവേശനം ലഭിച്ച 150 വിദ്യാര്‍ഥികള്‍ക്ക് പഠനാവസരം ഒരുക്കുന്നതിനുവേണ്ടി സര്‍ക്കാര്‍ ഇറക്കിയ ഓര്‍ഡിനന്‍സ് ഗവര്‍ണര്‍ മടക്കി.ഓർഡിനൻസിൽ കൂടുതൽ വ്യക്തത വേണമെന്നു ഓർഡിനൻസ് തിരിച്ചയച്ചുകൊണ്ടു ഗവർണർ അറിയിച്ചു.കണ്ണൂർ അഞ്ചരക്കണ്ടി മെഡിക്കൽ കോളജിലെ പ്രവേശനം സുപ്രീം കോടതി റദ്ദാക്കിയ സഹാചര്യത്തിലാണ് സർക്കാർ ഓർഡിനൻസുമായി മുന്നോട്ടുപോയത്. കോളജിലെ 150 കുട്ടികളുടെ പ്രവേശനം ജയിംസ് കമ്മിറ്റിയും തള്ളിയിരുന്നു. പ്രവേശനം ക്രമവിരുദ്ധമാണെന്ന് കണ്ടെത്തിയതിനെ തുടർന്നായിരുന്നു ഈ നടപടി..കഴിഞ്ഞ വര്‍ഷം സര്‍ക്കാരുമായി കരാറില്‍ ഏര്‍പ്പെടാതിരുന്ന കരുണ, കണ്ണൂര്‍ മെഡിക്കല്‍ കോളേജുകള്‍ നേരിട്ടാണ് പ്രവേശനം നടത്തിയത്.ഇക്കാര്യം പരിശോധിച്ച പ്രവേശന മേല്‍നോട്ട സമിതി കരുണയിലെ 30 വിദ്യാര്‍ഥികളുടെയും കണ്ണൂര്‍ മെഡിക്കല്‍ കോളേജിലെ മൂഴുവന്‍ വിദ്യാര്‍ഥികളുടെയും പ്രവേശനം റദ്ദാക്കിയിരുന്നു.സുപ്രീം കോടതി ഇടപെടലിനെത്തുടര്‍ന്ന് കരുണയിലെ ഭൂരിഭാഗം വിദ്യാര്‍ഥികളുടെയും പ്രശ്‌നത്തിന് പരിഹാരമായി. ഇതേത്തുടര്‍ന്നാണ് കണ്ണൂര്‍ മെഡിക്കല്‍ കോളേജില്‍ പ്രവേശനം നേടിയ 150 വിദ്യാര്‍ഥികള്‍ക്ക് പഠനാവസരം ഉറപ്പാക്കാന്‍ സര്‍ക്കാര്‍ നീക്കം തുടങ്ങിയത്.ഓര്‍ഡിനന്‍സ് ഇറക്കണമെന്ന നിയമോപദേശമാണ് ഈ വിഷയത്തില്‍ സര്‍ക്കാരിന് ലഭിച്ചത്. ഇതേത്തുടര്‍ന്ന് ഇറക്കിയ ഓര്‍ഡിനന്‍സാണ് വ്യക്തത ആവശ്യപ്പെട്ട് ഗവര്‍ണര്‍ മടക്കിയത്.

കൊച്ചി:നെടുമ്പാശ്ശേരി അന്താരാഷ്ട്ര വിമാനത്താവളത്തിൽ വൻ സ്വർണ്ണ വേട്ട.മൂന്നുപേരിൽ നിന്നായി ഒരുകോടിയിലധികം രൂപ വിലമതിക്കുന്ന സ്വർണ്ണമാണ് കസ്റ്റംസ് പിടികൂടിയത്. ജിദ്ദയിൽ നിന്നും സൗദി എയർലൈൻസ് വിമാനത്തിൽ വന്ന പെരിന്തൽമണ്ണ സ്വദേശി സിദ്ദിഖിന്റെ പക്കൽ നിന്നും രണ്ടു കിലോ സ്വർണ്ണമാണ് പിടിച്ചെടുത്തത്.സ്പീക്കറിന്റെ ട്രാൻസ്ഫോർമറിലുള്ള ചെമ്പുകമ്പി നീക്കം ചെയ്ത ശേഷം പകരം സ്വർണ്ണക്കമ്പി പിടിപ്പിക്കുകയായിരുന്നു. ദുബൈയിൽ നിന്നും ജെറ്റ് എയർവെയ്‌സ് വിമാനത്തിൽ വന്ന കർണാടകം സ്വദേശിയായ സിയാവുൽ ഹഖ് കാൽപ്പാദങ്ങളിൽ ഒട്ടിച്ചു വെച്ച് കടത്താൻ ശ്രമിച്ച 466 ഗ്രാം തൂക്കമുള്ള സ്വർണ്ണ ബിസ്‌ക്കറ്റുകളും പിടികൂടി.ഷാർജയിൽ നിന്നും എയർ ഏഷ്യ വിമാനത്തിൽ വന്ന നിയസിന്റെ പക്കൽ നിന്നും 703 ഗ്രാം സ്വർണ്ണമാണ് പിടികൂടിയത്.പെർഫ്യൂം ബോട്ടിലിന്റെ അടപ്പിനകത്ത് ചെറിയ മുത്തുകളുടെ രൂപത്തിലാണ് ഇവ ഒളിച്ചു കടത്താൻ ശ്രമിച്ചത്.

ആറളം:ആറളം ഫാം നഴ്സറിയിൽ കാട്ടാനക്കൂട്ടത്തിന്റെ ആക്രമണം.ഇന്നലെ പുലർച്ചെ നഴ്സറിയുടെ കമ്പിവേലി തകർത്ത് അകത്തുകടന്ന കാട്ടാനക്കൂട്ടം വിൽപ്പനയ്ക്ക് തയ്യാറാക്കിയ അഞ്ഞൂറോളം തെങ്ങിൻ തൈകൾ നശിപ്പിച്ചു.നഴ്സറിക്കുള്ളിലെ നിരവധി വലിയ തെങ്ങുകളും നശിപ്പിച്ചിട്ടുണ്ട്. ഫാമിൽ തൊഴിലാളികൾക്ക് ഭക്ഷണം കഴിക്കാനായി തയ്യാറാക്കിയ താൽക്കാലിക ഷെഡ്ഡും കാട്ടാനക്കൂട്ടം നശിപ്പിച്ചു.വർഷങ്ങൾക്ക് മുൻപ് ഫാമിനകത്തു സ്ഥാപിച്ച ശിലാഫലകവും ആനക്കൂട്ടം നശിപ്പിച്ചു.നാല് ആനകൾ അടങ്ങുന്ന കൂട്ടമാണ് ഫാമിലെത്തിയത്.ആറളം വന്യജീവി സങ്കേതത്തിൽ നിന്നും ആറളം ഫാം പുനരധിവാസ മേഖലയും കടന്നാണ് ആനക്കൂട്ടം ഫാമിന്റെ അധീനതയിലെത്തിയിരിക്കുന്നത്.3500 ഏക്കറോളം വ്യാപിച്ചു കിടക്കുന്ന ഫാമിന്റെ മധ്യഭാഗത്തായാണ് നഴ്സറി സ്ഥിതി ചെയ്യുന്നത്.ഫാമിനകത്തു നേരത്തെ കാട്ടാനക്കൂട്ടം നേരത്തെ നാശനഷ്ടങ്ങൾ വരുത്തിയിരുന്നെങ്കിലും നഴ്സറിയിലേക്ക് ഇതുവരെ പ്രവേശിച്ചിരുന്നില്ല.എന്നാൽ ഫാമിന്റെ പ്രധാന വരുമാന മാർഗമായ നഴ്സറിയിലേക്ക് കൂടി കാട്ടാന ശല്യം വ്യാപിച്ചതോടുകൂടി ഫാമിന്റെ നിലനിൽപ്പുതന്നെ അപകടത്തിലായിരിക്കുകയാണ്.വന്യജീവി സങ്കേതത്തിൽ നിന്നും അഞ്ചു കിലോമീറ്റർ അകലെയുള്ള കാട്ടാനക്കൂട്ടത്തെ വനത്തിലേക്ക് തുരത്തുക എന്നത് സാഹസികമാണ്.വനം വകുപ്പിന്റെ ഇടപെടലിലൂടെ മാത്രമേ ഇതിനു ഇതിനു പരിഹാരമുണ്ടാക്കാനാകൂ എന്നാണ് ഫാം അധികൃതർ പറയുന്നത്.