തലശ്ശേരി:ബെംഗളൂരുവിൽ നിന്നും 35 പവൻ സ്വർണം കവർന്ന മലയാളി യുവതി പോലീസ് പിടിയിൽ.തലശ്ശരി ടെംപിൾ ഗേറ്റ് പുതിയ റോഡിലെ ക്വാർട്ടേഴ്‌സിൽ വാടകയ്ക്ക് താമസിച്ചിരുന്ന തനൂജയെയാണ്(24) കേരളാ -കർണാടക പോലീസ് സംയുക്തമായി പിടികൂടിയത്.കവർച്ച ചെയ്ത സ്വർണ്ണം തലശ്ശേരി,കൂത്തുപറമ്പ് എന്നിവിടങ്ങളിലെ വിവിധ ബാങ്കുകളിൽ നിന്നും കണ്ടെടുത്തു. കർണാടക ആരോഗ്യവകുപ്പിലെ ജീവനക്കാരിയായ പയ്യന്നൂർ സ്വദേശിനിയുടെ വീട്ടിൽ നിന്നാണ് തനൂജ സ്വർണ്ണം മോഷ്ടിച്ചത്.കഴിഞ്ഞ ഓഗസ്റ്റിലാണ് തനൂജ ഇവരുടെ വീട്ടിൽ ജോലിക്കെത്തിയത്. സെപ്റ്റംബർ 28 മുതൽ തനൂജയെ ഇവിടെ നിന്നും കാണാതായി.തുടർന്ന് നടത്തിയ പരിശോധനയിൽ വീട്ടിൽ നിന്നും സ്വർണ്ണം കളവുപോയതായി കണ്ടെത്തി. ഇതേതുടർന്ന് വീട്ടമ്മ പോലീസിൽ പരാതി നൽകി.പോലീസ് അന്വേഷണത്തിൽ യുവതി നൽകിയ വിലാസം വ്യാജമാണെന്ന് കണ്ടെത്തുകയായിരുന്നു.പിന്നീട് തൊട്ടടുത്ത് താമസിച്ചിരുന്ന യുവാവുമായി തനൂജയ്ക്കുണ്ടായ പ്രണയം കണ്ടെത്തിയ പോലീസ് യുവതി കേരളത്തിൽ ഉണ്ടെന്നു കണ്ടെത്തി.തുടർന്ന് കർണാടക പോലീസ് കേരള പോലീസിന്റെ സഹായം തേടി.പോലീസിന്റെ നിർദേശ പ്രകാരം യുവാവ് തനൂജയെ വിളിച്ചു.താൻ വടകരയിൽ ഉണ്ടെന്നു യുവതി പറഞ്ഞതിനെ തുടർന്ന് പോലീസ് അന്വേഷിച്ചെത്തിയെങ്കിലും യുവതിയെ കണ്ടെത്താനായില്ല.ഇതിനിടയിൽ യുവതിക്ക് തലശ്ശേരിയിലെ ഓട്ടോ ഡ്രൈവറുമായി ബന്ധമുണ്ടെന്ന് കണ്ടെത്തിയ പോലീസ് ഇയാളെ കസ്റ്റഡിയിലെടുത്ത് ചോദ്യം ചെയ്തു.ഇയാളിൽ നിന്നാണ് യുവതിയുടെ ടെംപിൾ ഗേറ്റിനു സമീപത്തെ താമസസ്ഥലം കണ്ടെത്തിയത്.തുടർന്ന് യുവതിയെ പോലീസ് കസ്റ്റഡിയിലെടുത്തു ബംഗളൂരുവിലേക്ക് കൊണ്ടുപോയി.പ്രതിയെ അറസ്റ്റ് ചെയ്തു കോടതിയിൽ ഹാജരാക്കി റിമാൻഡ് ചെയ്തു.
