October 2017

ആലുവ: നടൻ ദിലീപിന് സുരക്ഷയൊരുക്കാൻ ഗോവയിൽ നിന്നുള്ള സ്വകാര്യ സുരക്ഷ ഏജൻസി എത്തി.നടിയെ ആക്രമിച്ച കേസിൽ ജാമ്യത്തിലിറങ്ങിയ ദിലീപിനെ കാണാൻ വെള്ളിയാഴ്ച ആറ് വാഹനങ്ങളിലായി സുരക്ഷ ഏജൻസിയിലെ ഉദ്യോഗസ്ഥർ എത്തി. ദിലീപിന്‍റെ ആലുവയിലെ വസതിയിൽ കൂടിക്കാഴ്ചയ്ക്ക് ശേഷം ഇവർ വെള്ളിയാഴ്ച തന്നെ മടങ്ങുകയും ചെയ്തു. എന്നാൽ സുരക്ഷ ഏജൻസിയിലെ മൂന്ന് ഉദ്യോഗസ്ഥർ ആലുവയിലെ ദിലീപിന്‍റെ വസതിയിൽ തന്നെ തുടരുകയാണ്.ദിലീപ് ഇത്തരത്തിൽ സ്വകാര്യ സുരക്ഷ ഏജൻസിയെ ഉപയോഗിച്ച് സംരക്ഷണം ഒരുക്കുന്നതിന്‍റെ കാരണം പോലീസിനും അറിവായിട്ടില്ല.വാർത്ത പരന്നതോടെ പോലീസും അങ്കലാപ്പിലായി. സുരക്ഷാവീഴ്ച സംഭവിച്ചോയെന്നറിയാൻ ഉന്നത പോലീസ് ഉദ്യോഗസ്ഥരും ജാകരൂകരായി. ഒടുവിൽ ദിലീപിന്‍റെ വീട്ടിലെ സുരക്ഷാസന്നാഹത്തെക്കുറിച്ച് മാധ‍്യമപ്രവർത്തകർ വിളിച്ചു വിവരം നൽകിയപ്പോഴാണ് പോലീസ് പോലും സംഭവമറിയുന്നത്.മാധ‍്യമപ്രവർത്തകരിൽ നിന്നും ലഭിച്ച സൂചനകളുടെ അടിസ്ഥാനത്തിൽ നടത്തിയ അന്വേഷണത്തിൽ സായുധസേനയിൽ നിന്നും വിരമിച്ച ഒരു കേണലിന്‍റെ നേതൃത്വത്തിലുള്ള സ്വകാര‍്യ സുരക്ഷാ ഏജൻസിയാണ് ആലുവിയിലെത്തിയതെന്ന് സ്ഥിരീകരിച്ചു. തണ്ടർഫോഴ്സിന്‍റെ കേരള മേധാവി വിരമിച്ച ഒരു ഐപിഎസ് ഉദ്യോഗസ്ഥനാണെന്നും സൂചനയുണ്ട്. തിരുവനന്തപുരത്തേക്കുള്ള യാത്രാമധ്യേ ദിലീപുമായുള്ള പരിചയം പുതുക്കാനാണ് വീട്ടിലെത്തിയതെന്നായിരുന്നു വിശദീകരണം.ദിലീപ് ജാമ‍്യം നേടിയെങ്കിലും പോലീസ് നിരീക്ഷണത്തിലാണിപ്പോഴും.  എന്നാൽ ഗോവയിലെ സ്വകാര‍്യ രഹസ‍്യാന്വേഷണ വിഭാഗത്തിന്‍റെ സന്ദർശനത്തെക്കുറിച്ച് വ‍്യക്തമായ വിശദീകരണം നൽകാൻ പോലീസിന് ഇതുവരെ കഴിഞ്ഞിട്ടില്ല.

കണ്ണൂർ:അഗതികളായ മനുഷ്യരെ സമൂഹത്തിന്റെ മുഖ്യധാരയിലെത്തിക്കാൻ സംസ്ഥാന സർക്കാർ നടപ്പിലാക്കുന്ന പുതിയ പദ്ധതിയാണ് അഗതിരഹിത സംസ്ഥാനം.ഈ പദ്ധതിയുടെ ജില്ലാതല വിവര ശേഖരണം ഇന്ന് ആരംഭിക്കും.സംസ്ഥാന സർക്കാരും കുടുംബശ്രീയും സംയുക്തമായി നടപ്പിലാക്കുന്ന പദ്ധതി സംരക്ഷിക്കാൻ ആരുമില്ലാത്തവർ,അഗതിയും അശരണരുമായ വ്യക്തികൾ,കുടുംബങ്ങൾ എന്നിവർക്കാണ് സംരക്ഷണം നൽകുക.ആശ്രയ പദ്ധതി ആരംഭിച്ചു പതിറ്റാണ്ടു കഴിഞ്ഞിട്ടും പദ്ധതിയിൽ വ്യാപക ക്രമക്കേടുകൾ ഉണ്ടെന്ന പരാതി നിലനിൽക്കുന്ന സാഹചര്യത്തിലാണ് സർക്കാർ അഗതിരഹിത പദ്ധതിയുമായി മുന്നോട്ട് വരുന്നത്.നിലവിൽ ആശ്രയ പദ്ധതിയിൽ ഉൾപ്പെട്ടവരും തുടർന്നും സേവനത്തിന് അർഹരായവരെ കണ്ടെത്തുന്ന ഏകീകൃത പദ്ധതി എന്ന നിലയിലാണ് പുതിയ പദ്ധതി ആരംഭിക്കുന്നത്.സർവേയിലൂടെ അഗതികളെന്നു കണ്ടെത്തുന്നവർക്ക് ഭക്ഷണം, ആരോഗ്യപരിപാലനം,വസ്ത്രം,വിദ്യാഭ്യാസം,ഉപജീവനമാർഗം,എന്നിവ കണ്ടെത്താൻ സഹായിക്കും.പദ്ധതിക്ക് ചിലവാകുന്ന തുകയുടെ നാൽപതു ശതമാനം സർക്കാർ കുടുംബശ്രീ വഴി ഓരോ പഞ്ചായത്തിനും ചലഞ്ച് ഫണ്ടായി നൽകും.പരിശീലനം ലഭിച്ച 560 കുടുംബശ്രീ പ്രവർത്തകരാണ് സർവ്വേ നടത്തുന്നത്.പ്രത്യേകം വികസിപ്പിച്ചെടുത്ത ആൻഡ്രോയിഡ് മൊബൈൽ അപ്ലിക്കേഷൻ ഉപയോഗിച്ച് ഓൺലൈനായാണ് സമഗ്ര വിവര ശേഖരണം നടത്തുക.അഗതികളുടെ ചുരുക്കപ്പട്ടിക പിന്നീട് പഞ്ചായത്ത് നോട്ടീസ് ബോർഡുകളിലും അങ്കണവാടികളിലും പ്രദർശിപ്പിക്കും.ഇതിൽ പരാതിയുള്ളവർ നവംബർ രണ്ടു മുതൽ അഞ്ചുവരെ രേഖാമൂലം സിഡിഎസ് ചെയർപേഴ്സനെ പരാതി  അറിയിക്കണം.പിന്നീട് ചുമതലപ്പെടുത്തുന്ന ഉദ്യോഗസ്ഥൻ പരാതി പരിശോധിച്ച് പട്ടിക തയ്യാറാക്കും.അന്തിമ പട്ടിക സംസ്ഥാനത്തെ എല്ലാപഞ്ചായത്തുകളും നവംബർ പതിനാറിന് ഗ്രാമസഭ കൂടി തീരുമാനിക്കും. പൂർത്തീകരിച്ച പട്ടിക കുടുംബശ്രീ ജില്ലാ മിഷൻ മുഖേന സംസ്ഥാന സർക്കാരിന് കൈമാറുകയും ചെയ്യും.അർഹരായ അഗതികളുടെ ആവശ്യങ്ങളും പരിമിതികളും കണ്ടെത്തി മാർഗരേഖ തയ്യാറാക്കേണ്ടത് ജില്ലാ കുടുംബശ്രീ മിഷന്റെ ചുമതലയാണ്.

കണ്ണൂർ:ജില്ലയിലെ കരാറുകാർ നടത്തിവരുന്ന സമരം പിൻവലിച്ച് തദ്ദേശ സ്ഥാപനങ്ങൾക്ക് കീഴിലുള്ള പൊതുമരാമത്തു വകുപ്പ് പ്രവൃത്തികൾ സമയബന്ധിതമായി പൂർത്തീകരിക്കണമെന്ന് ജില്ലാപഞ്ചായത്ത് അഭ്യർത്ഥിച്ചു.ജി എസ് ടി ബാധകമാണെന്ന കാര്യം ടെൻഡർ വ്യവസ്ഥകളിൽ ഉൾപ്പെടുത്തിയിട്ടുള്ളതിനാൽ കരാറുകാർ ആശങ്കപ്പെടേണ്ടതില്ലെന്നും യോഗം വിലയിരുത്തി.ജി എസ് ടി ഉൾപ്പെടെയുള്ള വിഷയങ്ങളിൽ കരാറുകാർക്ക് അനുകൂലമായ നിലപാട് സർക്കാർ സ്വീകരിച്ചിട്ടും സമരം തുടർന്നുകൊണ്ടുപോകുന്നത് ന്യായീകരിക്കാനാകില്ലെന്ന് യോഗത്തിൽ അധ്യക്ഷത വഹിച്ച ജില്ലാ പഞ്ചായത്ത് പ്രസിഡന്റ് കെ.വി സുമേഷ് പറഞ്ഞു.മണൽ,കരിങ്കല്ല്, ചെങ്കല്ല്  തുടങ്ങിയ നിർമാണ സാമഗ്രികൾ ലഭ്യമാക്കുന്നതിന് 15 ക്വാറികൾക്ക് ജില്ലയിൽ പ്രവർത്തനാനുമതി നൽകിയതായും യോഗം അറിയിച്ചു.ഈ മാസം അവസാനത്തോടെ ക്വാറികൾ പ്രവർത്തനക്ഷമമാകും.

കൊച്ചി:നിർബന്ധിത മതപരിവർത്തന കേന്ദ്രങ്ങൾ ഇല്ലാതാക്കണമെന്ന് ഹൈക്കോടതി നിർദേശം.ഇത്തരത്തിലുള്ള കേന്ദ്രങ്ങൾ പൂട്ടിക്കാൻ പോലീസ് നടപടിയെടുക്കണമെന്ന് ഹൈക്കോടതി വ്യക്തമാക്കി.മതപരിവർത്തന കേന്ദ്രങ്ങൾ പൗരന്റെ ഭരണഘടനാപരമായ അവകാശങ്ങൾ നിഷേധിക്കുകയാണ് ചെയ്യുന്നതെന്നും ഡിവിഷൻ ബെഞ്ച് വ്യക്തമാക്കി.മിശ്ര വിവാഹങ്ങളെ സമൂഹം പ്രോത്സാഹിപ്പിക്കണമെന്നും പ്രണയത്തിനൊടുവിൽ നടക്കുന്ന മിശ്രവിവാഹത്തെ ലവ് ജിഹാദായും ഖർ വാപസിയായും വ്യാഖ്യാനിക്കുന്നത് നടുക്കമുണ്ടാക്കുന്നുവെന്നും കോടതി വ്യക്തമാക്കി.താൻ വിവാഹം ചെയ്ത ശ്രുതി എന്ന പെൺകുട്ടിയെ വിട്ടുകിട്ടാൻ കണ്ണൂർ പരിയാരം സ്വദേശി അനീസ് ഹമീദ് നൽകിയ ഹർജി അനുവദിച്ചുകൊണ്ടാണ്‌ കോടതിയുടെ പരാമർശം. അനീസുമായുള്ള വിവാഹബന്ധം അവസാനിപ്പിക്കാൻ തൃപ്പൂണിത്തുറയിലുള്ള യോഗ കേന്ദ്രത്തിൽ താമസിപ്പിച്ച് തന്നെ നിർബന്ധിച്ചിരുന്നതായി ശ്രുതി കോടതിയിൽ മൊഴി നൽകിയിരുന്നു.ശ്രുതിയെ കണ്ടെത്താനുള്ള വാറന്റ് ചോദ്യം ചെയ്ത് ശ്രുതിയുടെ അച്ഛനമ്മമാരായ കണ്ണൂർ മണ്ടൂരുള്ള രാജനും ഗീതയും സമർപ്പിച്ച ഹർജിയും കോടതി പരിഗണിച്ചു.24 വയസ്സുള്ള തന്റെ മകളെ 2017 മെയ് 16 മുതൽ കാണാതായെന്ന് കാണിച്ചു ഇവർ പോലീസിൽ പരാതി നൽകിയിരുന്നു.ഹൈക്കോടതിയിൽ ഹർജിയും നൽകി.ശ്രുതി മതംമാറി അനീസിനെ വിവാഹം ചെയ്തെന്ന് പോലീസ് റിപ്പോർട്ട് നൽകിയതിനെ തുടർന്ന് ഹർജി തീർപ്പായി.