കൊച്ചി:നടിയെ ആക്രമിച്ച കേസിൽ നടൻ ദിലീപിനെതിരായുള്ള കുറ്റപത്രം മുഴുവൻ തെളിവുകളും ലഭിച്ചതിനു ശേഷം മാത്രമേ സമർപ്പിക്കുകയുള്ളൂ എന്ന് ഡിജിപി ലോക്നാഥ് ബെഹ്‌റ അറിയിച്ചു.ഇനിയും തെളിവുകൾ ലഭിക്കാനുണ്ടെന്നും കുറ്റപത്രത്തിൽ മുഴുവൻ തെളിവുകളും ഉൾപ്പെടുത്തുമെന്നും ബെഹ്‌റ അറിയിച്ചു.എന്നാൽ മെമ്മറി കാർഡും ഫോണും കിട്ടിയില്ലെങ്കിലും കുറ്റപത്രം സമർപ്പിക്കുന്നതിന് തടസ്സമില്ലെന്നുള്ള നിയമോപദേശമാണ് പൊലീസിന് ലഭിച്ചിട്ടുള്ളത്.കേസിൽ അന്വേഷണം ഏകദേശം പൂർത്തിയായി കഴിഞ്ഞതായാണ് പ്രോസിക്യൂഷൻ ഹൈക്കോടതിയെ അറിയിച്ചിട്ടുള്ളത്.
കൽപ്പറ്റ:കനത്ത മഴയെ തുടർന്ന് വയനാട്ടിലെ പടിഞ്ഞാറത്തറ നായ്മൂലയിൽ മണ്ണിടിച്ചിൽ ഉണ്ടായി. സംഭവത്തിൽ മൂന്ന് പേർ മണ്ണിനടിയിൽപ്പെട്ടതായാണ് സൂചന.ഒരാളെ രക്ഷപ്പെടുത്തി.സ്ഥലത്ത് രക്ഷാപ്രവർത്തങ്ങൾ തുടരുകയാണ്.
കണ്ണൂർ: കുടിയാൻമല കൈരളത്ത് മകൻ അച്ഛനെ തലയ്ക്കടിച്ച് കൊന്നു.പുലിക്കുരുമ്പ തണ്ടത്തിൽ അഗസ്തി(84) ആണ് മരിച്ചത്.മകൻ ബേബിയെ പോലീസ് അറസ്റ്റ് ചെയ്തു.കുടുംബ പ്രശ്നമാണ് കൊലപാതകത്തിനിടയാക്കിയതെന്നാണ് സൂചന.മദ്യപിച്ച് വീട്ടിലെത്തിയ ബേബി പിതാവുമായി കലഹിക്കുകയും പ്രകോപിതനായ ഇയാൾ അഗസ്തിയെ മർദിക്കുകയുമായിരുന്നു. പരിക്കേറ്റ അഗസ്തിയെ അയൽവാസികൾ എത്തി പരിയാരം മെഡിക്കൽ കോളേജ് ആശുപത്രിയിൽ എത്തിച്ചെങ്കിലും മരിച്ചിരുന്നു.കുടിയാന്മല പോലീസ് ഇൻക്വസ്റ്റ് നടത്തി പരിയാരം മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു കൊടുത്തു.
മൂന്നാർ:ദേവികുളം സബ്‌കളക്റ്റർ സഞ്ചരിച്ച വാഹനം കൊക്കയിലേക്ക് മറിഞ്ഞു. അത്ഭുതകരമായാണ് സബ്‌കളക്റ്റർ വി.ആർ പ്രേംകുമാറും ഗൺമാനും രക്ഷപ്പെട്ടത്.മൂന്നാർ മറയൂർ റോഡിലായിരുന്നു അപകടം.കാർ നിയന്ത്രണം വിട്ട് 30 അടി താഴ്ചയിലേക്ക് മറിയുകയായിരുന്നു.അപകടത്തിൽ കാർ പൂർണമായും തകർന്നു.കളക്റ്ററും ഗൺമാനും മാത്രമായിരുന്നു കാറിൽ ഉണ്ടായിരുന്നത്.ചിന്നാറിൽ നിന്നും മൂന്നാറിലേക്ക് വരികയായിരുന്നു ഇവർ.നിസാര പരിക്കേറ്റ ഇരുവരെയും ടാറ്റ ടീ ജനറൽ ആശുപത്രിയിൽ പ്രാഥമിക ചികിത്സയ്ക്ക് ശേഷം വിട്ടയച്ചു.
മാനന്തവാടി:കനത്ത മഴമൂലം വയനാട് ജില്ലയിലെ പ്രൊഫഷണൽ സ്കൂളുകൾ ഒഴികെയുള്ള വിദ്യാഭ്യാസ സ്ഥാപനങ്ങൾക്ക് കലക്റ്റർ ഇന്ന് അവധി പ്രഖ്യാപിച്ചു.
കൊച്ചി:നടിയെ ആക്രമിച്ച കേസിൽ ജയിലിൽ കഴിയുന്ന ദിലീപിന് ഹൈക്കോടതി ജാമ്യം നിഷേധിച്ചു.ആദ്യം അങ്കമാലി കോടതിയും പിന്നീട് ഹൈക്കോടതിയും ദിലീപിന് നേരത്തെ ജാമ്യം നിഷേധിച്ചിരുന്നു.പുതിയ വാദങ്ങളും ആരോപണങ്ങളും ഉൾക്കൊള്ളുന്ന പുതിയ ജാമ്യ ഹർജിയിലാണ് ഹൈക്കോടതിയുടെ നിർണായക വിധി വന്നിരിക്കുന്നത്.കേസ് അന്വേഷണം നിർണായക ഘട്ടത്തിലാണെന്നും ജാമ്യം നൽകിയാൽ ദിലീപ് പുറത്തിറങ്ങി സാക്ഷികളെ സ്വാധീനിക്കാൻ ഇടയുണ്ടെന്നും പ്രോസിക്യൂഷൻ കോടതിയിൽ വാദിച്ചു.ഈ വാദം മുഖവിലയ്‌ക്കെടുത്തുകൊണ്ടാണ് കോടതി ജാമ്യം നിഷേധിച്ചത്.
മഹാരാഷ്ട്ര:മഹാരാഷ്ട്രയിൽ ട്രെയിൻ പാളം തെറ്റി.കല്യാണിനു സമീപമാണ് നാഗ്പൂർ-മുംബൈ തുരന്തോ എക്സ്പ്രസ് പാളം തെറ്റിയത്.എൻജിനും അഞ്ചു ബോഗികളുമാണ് പാളം തെറ്റിയത്. നിരവധിപ്പേർക്ക് പരിക്കേറ്റു.രക്ഷാപ്രവർത്തനം തുടരുകയാണ്.കനത്ത മഴ രക്ഷാപ്രവർത്തനത്തെ പ്രതികൂലമായി ബാധിച്ചിട്ടുണ്ട്.യാത്രക്കാരെ ലക്ഷ്യസ്ഥാനത്തെത്തിക്കാൻ ബസുകളും മറ്റും അയച്ചതായി റെയിൽവേ അറിയിച്ചു.
കൊച്ചി:നടിയെ ആക്രമിച്ച കേസിൽ നടൻ ദിലീപിന്റെ ജാമ്യാപേക്ഷയിൽ ഹൈക്കോടതി ഇന്ന് വിധി പറയും.അറസ്റ്റിലായി അൻപതാം ദിവസമാണ് ദിലീപിന്റെ അപേക്ഷയിൽ കോടതി ഇന്ന് വിധി പറയുന്നത്.രാവിലെ 10.30 ഓടെ വിധി പറയുമെന്നാണ് സൂചന.ദിലീപിന് ജാമ്യം കിട്ടിയാൽ റോഡ് ഷോ അടക്കമുള്ള വിപുലമായ പരിപാടികളാണ് താരത്തിന്റെ ഫാൻസ്‌ അസോസിയേഷനുകൾ പ്ലാൻ ചെയ്തിരിക്കുന്നത്.
ചണ്ഡീഗഡ്:ബലാത്സംഗകേസില്‍ ഗുര്‍മീത് റാം റഹീം സിങിന് ശിക്ഷ വിധിച്ചതിന് തൊട്ടുപിന്നാലെ ദേര സച്ചയുടെ ആശ്രമം സ്ഥിതിചെയ്യുന്ന സിര്‍സയിലടക്കം അനുയായികള്‍ അക്രമം അഴിച്ചുവിട്ടു. നിരവധി വാഹനങ്ങള്‍ക്ക് അക്രമികള്‍ തീയിട്ടു. സംഘര്‍ഷത്തെ തുടര്‍ന്ന് സൈന്യം വിവിധ പ്രദേശങ്ങളില്‍ ഫ്ലാഗ് മാര്‍ച്ച് നടത്തി. പഞ്ചാബ്, ഹരിയാന സര്‍ക്കാരുകള്‍ അടിയന്തരയോഗം ചേര്‍‍ന്ന് സ്ഥിതിഗതികള്‍ വിലയിരുത്തി.ശിക്ഷാവിധി പുറത്തുവരുമ്പോള്‍ അക്രമസംഭവങ്ങള്‍ ഉണ്ടാകാനുള്ള സാധ്യത കണക്കിലെടുത്ത് കനത്ത സുരക്ഷയാണ് ഹരിയാനയിലും പഞ്ചാബിലും ഒരുക്കിയിരുന്നത്.എന്നാല്‍ കോടതി നടപടി പുരോഗമിക്കുമ്പോള്‍ തന്നെ റാം റഹീമിന്‍റെ ആശ്രമം സ്ഥിതിചെയ്യുന്ന സിര്‍സയില്‍ അനുയായികള്‍ ആക്രമണം ആരംഭിച്ചു. സിര്‍സയില്‍ രണ്ട് വാഹനങ്ങള്‍ ദേര സച്ചാ പ്രവര്‍ത്തകര്‍ അഗ്നിക്കിരയാക്കി. വിധി വന്നശേഷം ഫുല്‍ക്കയില്‍ രണ്ട് ബസ്സുകള്‍ കൂടി പ്രവര്‍ത്തകര്‍ തീയിട്ടുനശിപ്പിച്ചു.അക്രമം ആരംഭിച്ചതോടെ ദേര ഹെഡ് ക്വാര്‍ട്ടേഴ്സിലെ ഫോണ്‍ ബന്ധം അധികൃതര്‍ വിച്ഛേദിച്ചു.വിധി അംഗീകരിക്കണമെന്നും ആക്രമണങ്ങളില്‍ നിന്ന് വിട്ട് നില്‍ക്കണമെന്നും ഉന്നതതലയോഗത്തിന് ശേഷം പഞ്ചാബ് മുഖ്യമന്ത്രി ജനങ്ങളോട് അഭ്യര്‍ത്ഥിച്ചു.
ബെംഗളൂരു:ബെംഗളൂരുവിൽ ഒൻപതു വയസ്സുകാരിയെ അമ്മ കെട്ടിടത്തിന് മുകളിൽ നിന്നും താഴേക്കെറിഞ്ഞു കൊന്നു.ബെംഗളൂരു ജെ.പി നഗറിൽ താമസിക്കുന്ന സ്വാതി സർക്കാർ എന്ന യുവതിയാണ് മകളായ അഷിക സർക്കാരിനെ കൊലപ്പെടുത്തിയത്.സംഭവവുമായി ബന്ധപ്പെട്ട് സ്വാതിയെ പോലീസ് കസ്റ്റഡിയിലെടുത്തു.കുട്ടിയെ താഴേക്ക് വലിച്ചെറിഞ്ഞ ഇവർ താഴെയിറങ്ങി രക്തത്തിൽ കുളിച്ചു കിടക്കുന്ന കുട്ടിയെ മുകളിലേക്ക് കൊണ്ടുപോയി വീണ്ടും വലിച്ചെറിയുകയായിരുന്നു.സംഭവത്തിന് ശേഷം രക്ഷപെടാൻ ശ്രമിച്ച സ്വാതിയെ നാട്ടുകാർ ചേർന്ന് കെട്ടിയിടുകയായിരുന്നു.സംഭവത്തെ കുറിച്ച് ചോദിച്ച പോലീസുകാരുടെ ഇവർ തട്ടിക്കയറി.തന്റെ മകളെ എന്തും ചെയ്യാനുള്ള അവകാശം തനിക്കുണ്ടെന്നും അത് ചോദിയ്ക്കാൻ നിങ്ങൾക്ക് എന്ത് അധികാരമാണുള്ളതെന്നും ഇവർ പോലീസിനോട് ചോദിച്ചു.ഇവർ മുൻപും കുട്ടിയെ കെട്ടിടത്തിന് മുകളിൽ നിന്നും വലിച്ചെറിയാൻ ശ്രമിച്ചിട്ടുണ്ടെന്നു അയൽവാസികൾ പറഞ്ഞു.