June 2017

കൊച്ചി: നടിയുമായി ഇപ്പോൾ തനിക്കു   നല്ല സൌഹൃദമില്ലെന്ന് ദിലീപ് പോലീസിനോട് പറഞ്ഞു. ആക്രമം ഉണ്ടായപ്പോൾ താൻ ബന്ധപ്പെട്ടിരുന്നു എന്നാൽ നടി സഹകരിച്ചില്ല എന്നും ദിലീപ്. തനിക്ക് പൾസർ സുനിയുമായ് ബന്ധമില്ലെന്നുംചോദ്യം ചെയ്തപ്പോൾ ദിലീപ് പറഞ്ഞു. ദിലീപും നടിയുമായുള്ള ബന്ധവും റിയൽ എസ്റ്റേറ്റ് ബിസിനസും സംബന്ധിച്ച കാര്യങ്ങൾ പോലീസ് ചോദിച്ചറിഞ്ഞു. ആവശ്യമെങ്കിൽ ദിലീപിനെ ഇനിയും ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം.കേസിൽ ഇതുവരെ നടന്ന അന്വേഷണത്തിൽ  നിന്ന് ലഭിച്ച തെളിവുകൾ വച്ച് അന്വേഷണ  സംഘം വ്യത്യതസ്ത ചോദ്യാവലി തയ്യാറാക്കി. ഇതനുസരിച്ച വിശദമായ ചോദ്യം ചെയ്യലായിരുന്നു ആലുവ പോലീസ് ക്ലബ്ബിൽ 13 മണിക്കൂർ നടന്നത്.പല കാര്യങ്ങളും ദിലീപ് നിഷേധിച്ചു. നടിയുമായുള്ള ദിലീപിന്റെ സൌഹൃദവും പിന്നീട് നടിയുമായി അകലാനുള്ള കാരണം എന്നിവയിൽ അന്വേഷണ സംഘം ചോദിച്ചറിഞ്ഞു. നടിയെ ആക്രമിച്ച സംഭവത്തിലെ തന്റെ പങ്ക് പൂർണമായും നിഷേധിച്ച ദിലീപ് സംഭവം അറിയുന്നത് ഒരു സുഹൃത്ത് ഫോണിൽ വിളിച്ചറിയിച്ചപ്പോഴാണെന്ന് അന്വേഷണ സംഘത്തോട് പറഞ്ഞു

പെരിങ്ങോം: എരമം–കുറ്റൂർ പഞ്ചായത്തിലെ ‍പെരുവാമ്പയിൽ ‍ ഉരുൾപൊട്ടി വ്യാപക നാശം. ഇന്നലെ രാവിലെ ആറോടെയാണ് സംഭവം. പെരുവാമ്പ വയനാട്ടുകുലവൻ ക്ഷേത്രത്തിനു സമീപം സ്വകാര്യ വ്യക്തിയുടെ അനധികൃത കരിങ്കൽ ക്വാറിയിൽ നിന്നാണ് ഉരുൾപൊട്ടൽ ഉണ്ടായത്. ക്വാറിയിൽ നിന്ന് ഒരുകിലോ മീറ്ററോളം താഴോട്ടുള്ള പെരുവാമ്പ പുഴ വരെയുള്ള പ്രദേശങ്ങൾ മലവെള്ളപ്പാച്ചിലിൽ പെട്ടു.പെരുവാമ്പ വയനാട്ടുകുലവൻ ക്ഷേത്രത്തിന്റെ മതിലും കാവും ഗുളികൻ സ്ഥാനവും തകർന്നു.സൂര്യ സ്റ്റോറിൽ ചായക്കട നടത്തുന്ന യു.വി.ഗംഗാധരൻ, ഹോട്ടലിൽ പാലുമായെത്തിയ സി.ജെ.റോയ്, പുഴയിൽ കുളിക്കാനെത്തിയ എൻ.ഇസ്മായിൽ എന്നിവർ തലനാരിഴയ്ക്കു രക്ഷപ്പെട്ടു. ഗംഗാധരന്റെ ചായക്കട ഒഴുക്കിൽപെട്ട് തകർന്നു.തളിയിൽ അശോകന്റെ തൊഴുത്തും പശുവും കിടാവും ഒഴുക്കിൽപെട്ടു. തൊഴുത്ത് പൂർണമായി തകർന്നു.പശുവിനെയും കിടാവിനെയും നാട്ടുകാർ രക്ഷപ്പെടുത്തി.അനുമതിയില്ലാതെ കരിങ്കൽ ക്വാറി പ്രവർത്തിപ്പിച്ച ക്വാറി ഉടമയ്ക്കെതിരെ നിയമ നടപടി സ്വീകരിക്കുമെന്നും ക്വാറി പ്രവർത്തനം നിർത്തി വയ്പിക്കുമെന്നും തഹസിൽദാർ പ്രദേശവാസികൾക്ക് ഉറപ്പ് നൽകി.

കൊച്ചി:നടി ആക്രമിക്കപ്പെട്ട കേസിൽ ഇന്നലെ ആലുവ പോലീസ് ക്ലബ്ബിൽ നടന്നത് മൊഴിയെടുക്കലല്ല  ചോദ്യം ചെയ്യൽ ആയിരുന്നു എന്ന് പോലീസ്.ഇന്നലെ പതിമൂന്നു മണിക്കൂർ നീണ്ട ചോദ്യം ചെയ്യലിൽ ഇരുവരും ഒന്നിച്ചു നൽകിയ മൊഴികളും വെവ്വേറെ നൽകിയ മൊഴികളും പരിശോധിച്ച് വരികയാണ്.ഇതിനു ശേഷം കാര്യങ്ങളിൽ വ്യക്തത വരുത്താൻ ഇരുവരെയും വീണ്ടും ചോദ്യം ചെയ്യേണ്ടി വരുമെന്ന് ആലുവ റൂറൽ എസ്.പി എ.വി ജോർജ് സൂചിപ്പിച്ചു.ബ്ലാക്‌മെയ്ൽ ചെയ്തു പണം തട്ടാൻ ശ്രമിച്ചുവെന്ന ദിലീപിന്റെ പരാതിയിൽ വിശദമായ പരിശോധന വേണ്ടി വരുമെന്നും എസ്.പി പറഞ്ഞു.അതിനു ശേഷമേ പരാതിയിൽ കേസെടുക്കുന്ന കാര്യം തീരുമാനിക്കൂ.ദിലീപിന്റെ പരാതിയിൽ മാത്രമല്ല ചോദ്യം ചെയ്യുന്നത്,നടിയെ ആക്രമിച്ച സംഭവത്തിലെ ഗൂഢാലോചനയും അന്വേഷിക്കുന്നുണ്ടെന്നു എസ്.പി പറഞ്ഞു.

കണ്ണൂർ:ധർമടം പഞ്ചായത്തോഫിസിലെ എൽ.ഡി ക്ലർക്കിനു സസ്പെൻഷൻ.പഞ്ചായത്തോഫീസിലെത്തിയ സ്വാതന്ത്ര സമര സേനാനി മേലൂരിലെ രൈരു നായരോട് മോശമായി പെരുമാറി എന്ന പരാതിയിലാണ് നടപടി.എൽ.ഡി ക്ലാർക്ക് പ്രേമൻ മൂർക്കോത്തിനെയാണ് ജില്ലാ പഞ്ചായത്ത് ഡയറക്ടർ അന്വേഷണ വിധേയമായി സസ്‌പെൻഡ് ചെയ്തത്.കഴിഞ്ഞ മെയ് 23 നു പഞ്ചായത്തു പ്രസിഡന്റിനുള്ള നിവേദനവുമായി ഓഫീസിലെത്തിയ രൈരു നായരെ അപമാനിക്കുന്ന തരത്തിൽ ഉദ്യോഗസ്ഥൻ പെരുമാറി എന്നാരോപിച്ചു വിജയൻ തുണ്ടിയിൽ മുഖ്യമന്ത്രിക്ക് പരാതി നൽകിയിരുന്നു.തുടർന്നു നടന്ന അന്വേഷണത്തിലാണ് നടപടി.