വളപട്ടണം: വളപട്ടണത്ത് അഴീക്കൽ റോഡിൽ റെയിൽവേ അടിപ്പാതയ്ക്ക് സമീപം ലോറി സ്റ്റാന്റിനോട് ചേർന്ന് മാലിന്യം കുമിഞ്ഞു കൂടുന്നു. പഞ്ചായത്ത് ഓഫീസിന്റെയും വളപട്ടണം പ്രാഥമിക ആരോഗ്യ കേന്ദ്രത്തിന്റെയും മൂക്കിന് താഴെ ആയിട്ടും ഭരണ സമിതിയും ആരോഗ്യ വകുപ്പ് അധികൃതരും തിരിഞ്ഞു നോക്കുന്നില്ലത്രേ. പഞ്ചായത്ത് അധികൃതർ തന്നെ ഇവിടെ മാലിന്യം തള്ളുന്ന കേന്ദ്രമാക്കിയെന്നാണ് ആരോപണം. പഞ്ചായത്ത് തള്ളുന്ന മാലിന്യങ്ങൾക്ക് പുറമെ സാമൂഹ്യദ്രോഹികൾ പ്ലാസ്റ്റിക് ചാക്കുകളിലാക്കി മാലിന്യം കൊണ്ട് തള്ളുന്നതും പതിവാക്കിയിട്ടുണ്ട്. അറവു മാലിന്യം തള്ളുന്നത് കാരണം തെരുവ് നായ്ക്കളുടെ ശല്യവും വർധിച്ചിട്ടുണ്ട്.
