April 2017

ഇരിട്ടി: മുള്ളന്‍പന്നിയെ വെട്ടയാടിക്കൊന്ന് ഇറച്ചിയാക്കി ഉണക്കി സൂക്ഷിക്കുന്നതിനിടയില്‍ അയ്യന്‍കുന്ന് പഞ്ചായത്തിലെ രണ്ടാംകടവ് കളിതട്ടുംപറായിലെ വലിയവീട്ടില്‍ ജെയിംസി(50)നെ പോലീസ് അറസ്റ്റു ചെയ്തു. കൊട്ടിയൂര്‍ റേഞ്ച് ഓഫീസര്‍ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് ഇയാള്‍ പിടിയിലായത്. ഇയാളുടെ പക്കല്‍നിന്ന് ആറുകിലോ മുള്ളന്‍പന്നിയുടെ ഉണക്കിയ ഇറച്ചി ലഭിച്ചു.പ്രതിയെ മട്ടന്നൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു. മുള്ളന്‍പന്നിയെ വേട്ടയാടിക്കൊല്ലുന്നത് മൂന്നുവര്‍ഷംവരെ തടവുശിക്ഷ ലഭിക്കാവുന്ന കുറ്റമാണ്.

ദുബൈ: ദുബൈയില്‍ ബുര്‍ജ് ഖലീഫക്ക് സമീപമുള്ള കെട്ടിടത്തില്‍ വന്‍ തീപിടിത്തം. പുലര്‍ച്ചെ അഞ്ചരയോടെയാണ് തീപിടിത്തമുണ്ടായത്. അപകടത്തില്‍ ആളപായം റിപ്പോര്‍ട്ട് ചെയ്തിട്ടില്ല. ബുര്‍ജ് ഖലീഫക്ക് സമീപമുള്ള എമ്മാര്‍ കെട്ടിടത്തിനാണ് തീപിടിച്ചത്. മൂന്നു മണിക്കൂറിനുള്ളില്‍ നീണ്ട പരിശ്രമത്തിനൊടുവിലാണ് തീ നിയന്ത്രണ വിധേയമാക്കാന്‍ കഴിഞ്ഞതെന്ന് ദുബൈ സിവില്‍ ഡിഫന്‍സ് വിഭാഗം അറിയിച്ചു.തീ പൂര്‍ണമായി അണക്കാനുള്ള ശ്രമം പുരോഗമിക്കുകയാണ്

തിരുവനന്തപുരം: പള്‍സ് പോളിയോ വിതരണത്തിന്റെ രണ്ടാംഘട്ടം ഇന്ന്. അഞ്ചു വയസ്സിന് താഴെയുള്ള എല്ലാ കുട്ടികള്‍ക്കും ഒരേസമയം  തുള്ളിമരുന്ന് നല്‍കുകയാണ് പരിപാടിയുടെ ലക്ഷ്യം. പ്രത്യേകം സജ്ജീകരിച്ച ഇമ്മ്യൂണൈസേഷന്‍ ബൂത്തുകളിലും നാളെയും മറ്റന്നാളും ആരോഗ്യപ്രവര്‍ത്തകരുടെ നേതൃത്വത്തില്‍ ഭവനസന്ദര്‍ശനം നടത്തിയും പോളിയോ തുള്ളിമരുന്ന് വിതരണം ചെയ്യും.

ഇരിട്ടി: ഇരിട്ടിക്കടുത്ത കടത്തുംകടവ് പുഴയില്‍ മുങ്ങിമരിച്ച കടത്തുംകടവ് സെന്റ് ജോണ്‍സ് ബാപ്റ്റിസ്റ്റ് ഇംഗ്ലീഷ് സ്‌കൂളിലെ പത്താംതരം വിദ്യാര്‍ഥി സൗരവി(16)ന് നാടിന്റെ അന്ത്യാജ്ഞലി. കല്ലുമുട്ടി മൗണ്ട് ഫ്‌ളവറിലെ കൊല്ലനാണ്ടി രമേശന്റെയും പ്രസന്നയുടെയും മകനാണ്. എസ്.എസ്.എല്‍.സി. പരിക്ഷ കഴിഞ്ഞ് സ്‌കൂള്‍ അടയ്ക്കുന്ന സന്തോഷത്തില്‍ കുട്ടുകാരോടൊത്ത് അഹ്ലാദംപങ്കിട്ട സൗരവ് ഷര്‍ട്ടിലുള്ള ചായം കഴുകിക്കളയാന്‍ സ്‌കുളിന് സമീപത്തുള്ള ഇരിട്ടി കടത്തുകടവ് പുഴയിലിറങ്ങിയപ്പോഴായിരുന്നു അപകടം. പ്രിയ കുട്ടുകാരന്റെ അകസ്മിക വേര്‍പ്പാട് സഹപാഠികളെയും ഒപ്പം അധ്യാപകരെയും നാട്ടുകാരെയും കണ്ണിരിലാഴ്ത്തി.