പത്തനംതിട്ട: കോഴഞ്ചേരി ജില്ലാ ആശുപത്രിയില്‍ നിന്ന് നവജാതശിശുവിനെ തട്ടിക്കൊണ്ടു പോയ സംഭവത്തിലെ പ്രതി റാന്നി വെച്ചൂച്ചിറ പുത്തന്‍പുരയില്‍ വീട്ടില്‍ അനീഷിന്റെ ഭാര്യ ബീന (32) യെ റാന്നി കോടതിയില്‍ ഹാജരാക്കി റിമാന്‍ഡ് ചെയ്തു. റിമാന്‍ഡിലായ പ്രതിയെ പത്തനംതിട്ട ജില്ലാ ജയിലിലേക്ക് മാറ്റി. ഇവരുടെ ശരിയായ പേര് ബീന എന്നാണെന്നും ലീന എന്ന പേര് നൽകി പോലീസിനെ തെറ്റിദ്ധരിപ്പിക്കുകയായിരുന്നെന്നും ജില്ലാ പോലിസ് മേധാവി ബി അശോകന്‍ അറിയിച്ചു. ഇപ്പോള്‍ അറസ്റ്റ് ചെയ്തത് ഒരാളെ മാത്രമാണെങ്കിലും കൂടുതല്‍ ആളുകള്‍ ഇതില്‍ ഉള്‍പെട്ടിട്ടുണ്ടോയെന്ന് അന്വേഷിക്കുന്നുണ്ടെന്നും അദ്ദേഹം പറഞ്ഞു. കോഴഞ്ചേരി ജില്ലാ ആശുപത്രിയിലെ പ്രസവ വാര്‍ഡില്‍ നിന്ന് കഴിഞ്ഞ ദിവസം രാവിലെ 11നാണ് ജീവനക്കാരിയെന്ന വ്യാജേന പത്തനാട് പനയ്ക്കപതാലില്‍ പാസ്റ്റര്‍ സജി ചാക്കോ – അനിതാമോള്‍ ജോസഫ് ദമ്പതികളുടെ നാല് ദിവസം പ്രായമുള്ള ആണ്‍കുഞ്ഞിനെ ബീന മോഷ്ടിച്ചുകടന്നത്.
