March 2017

തിരുവനന്തപുരം: ജിഷ്ണു പ്രണോയ്ക്ക് ഇതുവരെ നീതി ലഭിച്ചില്ലെന്നാരോപിച്ച് മാതാപിതാക്കൾ ഡി ജി പി യുടെ ഓഫീസിനു മുന്നിൽ അനിശ്ചിത കാല നിരാഹാര സമരത്തിന് ഒരുങ്ങുന്നു. ജിഷ്ണുവിന്റെ മരണത്തിനു കാരണമായവരെ കണ്ടെത്തിയെങ്കിലും അവർക്കെതിരെ നടപടിയൊന്നും സ്വീകരിച്ചില്ലെന്നാരോപിച്ചാണ് നിരാഹാര സമരം . ഈ മാസം27  മുതൽ സമരം തുടങ്ങുമെന്ന് ജിഷ്ണുവിന്റെ മാതാപിതാക്കൾ അറിയിച്ചു.

തിരുവനന്തപുരം: പകല്‍ സമയങ്ങളിൽ താപനില ക്രമാതീതമായി ഉയരുന്നതിനാല്‍ വെയിലേറ്റ് പണിയെടുക്കുന്ന തൊഴിലാളികള്‍ക്ക് സൂര്യാഘാതം ഏല്‍ക്കുന്നത് ഒഴിവാക്കാന്‍ ജോലി സമയം പുനഃക്രമീകരിച്ച് ലേബര്‍ കമ്മീഷണര്‍ ഉത്തരവിറക്കി. ഇതനുസരിച്ച് ഏപ്രില്‍ 30 വരെ പകല്‍ ഷിഫ്റ്റില്‍ ജോലി ചെയ്യുന്നവര്‍ക്ക് ഉച്ചയ്ക്ക് പന്ത്രണ്ട് മുതല്‍ മൂന്ന് വരെ വിശ്രമസമയം ആണ്. തൊഴിലിടങ്ങളില്‍ നേരിട്ട് പരിശോധന നടത്തി ജില്ലാ ലേബര്‍ ഓഫീസർമാരോട് റിപ്പോര്‍ട്ട് നല്‍കാന്‍ കമ്മീഷണര്‍ നിര്‍ദേശിച്ചിട്ടുണ്ട്.

കണ്ണൂര്‍: ജില്ലാ ആസ്പത്രിയുടെ വികസനം കിഫ്ബി ഫണ്ട് ഉപയോഗിച്ചാണ് നടപ്പാക്കുകയെന്ന് ആരോഗ്യമന്ത്രി കെ.കെ.ശൈലജ പറഞ്ഞു. ലഹരിക്കെതിരെ സര്‍ക്കാര്‍ നടപ്പാക്കുന്ന ‘വിമുക്തി’ പദ്ധതിയുടെ ജില്ലാതല ഉദ്ഘാടനം നിര്‍വഹിക്കുകയായിരുന്നു മന്ത്രി.പദ്ധതിയുടെ ഭാഗമായി വീടുകളില്‍ പതിക്കുന്ന സ്റ്റിക്കറിന്റെ ലോഗോ ജില്ലാപഞ്ചായത്ത് പ്രസിഡന്റ് കെ.വി.സുമേഷിന് നല്‍കി തുറമുഖ മന്ത്രി രാമചന്ദ്രന്‍ കടന്നപ്പള്ളി പ്രകാശനം ചെയ്തു.കണ്ണൂര്‍ ടൗണ്‍സ്‌ക്വയറില്‍ നടന്ന ചടങ്ങില്‍ ജില്ലാപഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷതവഹിച്ചു. മേയര്‍ ഇ.പി.ലത ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. പരിപാടിയിൽ കണ്ണൂര്‍ എക്‌സൈസ് ഡിവിഷനിലെ ഉദ്യോഗസ്ഥര്‍ അവതരിപ്പിച്ച വരല്ലേ… ഈ വഴിയേ…എന്ന ലഹരിവിരുദ്ധ ബോധവത്കരണ നാടകവും അവതരിപ്പിച്ചു.

തിരുവനന്തപുരം : പീഡനത്തിന് ന്യായീകരണവുമായി മന്ത്രിതന്നെ രംഗത്ത്. ആഭ്യന്തര മന്ത്രിയോ പൊലീസോ വിചാരിച്ചാൽ ഒന്നും ചെയ്യാൻ കഴിയില്ലെന്നും പീഡനത്തിൽ പെടാതെ സ്വയം രക്ഷിക്കാൻ ഓരോരുത്തരും ശ്രമിക്കണമെന്നും മന്ത്രി സുധാകരൻ. സ്ത്രീ പീഡനങ്ങളെല്ലാം വ്യക്തിപരമാണ്. അതിൽ രാഷ്ട്രീയമില്ല. കുറ്റവാളികളെ രക്ഷിയ്ക്കാൻ ഉന്നതന്മാർ രംഗത്തിറങ്ങും. സ്ത്രീകൾക്ക് എവിടെയും സഞ്ചരിക്കാൻ അവകാശമുണ്ടെങ്കിലും പോകുന്ന സ്ഥലം മനസിയിലാക്കിയിട്ടേ പോകാവൂ. ഇഷ്ടപ്പെടുന്നവരെ ചുംബിക്കുന്നത് വീട്ടിൽ വെച്ചാവണം. കേരള സമൂഹം കുത്തഴിഞ്ഞു കിടക്കുകയാണ്. ഇന്നിറങ്ങുന്ന 90 ശതമാനം സിനിമകളും ആളുകളെ വഴി തെറ്റിക്കുന്നവയാണ്.  അദ്ദേഹം പറഞ്ഞു.