കായംകുളം:ദേശീയപാതയില്‍ കെഎസ്‌ആര്‍ടിസി മിന്നല്‍ സൂപ്പര്‍ എയര്‍ ഡീലക്സ് ബസും ലോറിയും കൂട്ടിയിടിച്ച് 15 പേര്‍ക്ക് പരിക്കേറ്റു.ഇതില്‍ മൂന്ന് പേരുടെ നില ഗുരുതരമാണ്. പരിക്കേറ്റവരെ കായംകുളം താലൂക്ക് ആശുപത്രിയിലും ആലപ്പുഴ മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.ഇന്ന് പുലര്‍ച്ചെ അഞ്ചരയോടെ ദേശീയപാതയില്‍ കായംകുളം ഒഎന്‍കെ ജംഗ്‌ഷന് സമീപത്താണ് അപകടം നടന്നത്.മാനവന്തവാടിയില്‍ നിന്നും തിരുവന്തപുരത്തേക്ക് പോകുകയായിരുന്ന മിന്നല്‍ ബസ്സാണ് അപകടത്തിൽപ്പെട്ടത്.മറ്റൊരു വാഹനത്തെ മറികടന്ന് വേഗതയിലെത്തിയ ബസ് എതിരെ വന്ന ലോറിയുമായി കൂട്ടിയിടിക്കുകയായിരുന്നു.ഇടിയുടെ ആഘാതത്തില്‍ ബസ് ഡ്രൈവര്‍ പിന്നിലേക്ക് തെറിച്ചുവീണു. നിയന്ത്രണം വിട്ട ബസ് ഡ്രൈവറില്ലാതെ മുന്നൂറ് മീറ്റർ മുൻപോട്ട് പോവുകയും സമീപത്തെ വീടിന്‍റെ മതിലിലേക്ക് ഇടിച്ചുകയറി നില്‍ക്കുകയുമായിരുന്നു. പുലർച്ചെയായതിനാൽ ദേശീയപാതയിൽ തിരക്ക് കുറവായതിനാൽ വന്‍ ദുരന്തമാണ് ഒഴിവായത്.