ശബരിമല: എരുമേലി- പമ്പ പാതയിലെ കണമലയില്‍ ശബരിമല തീര്‍ഥാടകര്‍ സഞ്ചരിച്ച ബസ് നിയന്ത്രണം വിട്ട് മറിഞ്ഞ് പതിനഞ്ചോളം തീര്‍ഥാടകര്‍ക്ക് പരിക്കേറ്റു.കണമല അട്ടിവളവിന് സമീപത്തെ കൊടും വളവില്‍ തിങ്കളാഴ്ച രാവിലെ എട്ടരയോടെ ആയിരുന്നു അപകടം. അപകടത്തില്‍ പരിക്കേറ്റവരെ എരുമേലി സര്‍ക്കാര്‍ ആശുപത്രിയില്‍ പ്രവേശിപ്പിച്ചു.ആന്ധ്രയില്‍ നിന്നുമെത്തിയ തീര്‍ഥാടകര്‍ സഞ്ചരിച്ച ബസാണ് അപകടത്തില്‍പ്പെട്ടത്. എരുമേലിയിൽ നിന്നും പമ്പയിലേക്ക് പോവുകയായിരുന്നു തീർത്ഥാടകർ.പമ്പാ വാലിയിലെ ഇറക്കത്തിൽ ബസ് തലകീഴായി മറിയുകയായിരുന്നു.അഗ്നിശമന സേനയടക്കം സ്ഥലത്തെത്തി രക്ഷാപ്രവര്‍ത്തനം നടത്തി.