തിരുവനന്തപുരം:വാരാപ്പുഴയിൽ പോലീസ് കസ്റ്റഡിയിൽ കൊല്ലപ്പെട്ട ശ്രീജിത്തിന്റെ കുടുംബത്തിന് മുഖ്യമന്ത്രിയുടെ ദുരിതാശ്വാസനിധിയിൽ നിന്നും പത്തുലക്ഷം രൂപ ധനസഹായം പ്രഖ്യാപിച്ചു.ശ്രീജിത്തിന്റെ ഭാര്യക്ക് യോഗ്യതയ്ക്കനുസരിച്ച് ക്ലാസ് ത്രീ തസ്തികയിൽ സർക്കാർ ജോലിയും നൽകും. ധനസഹായമായി സർക്കാർ നൽകുന്ന പത്തുലക്ഷം രൂപ ശ്രീജിത്തിന്റെ മരണത്തിനു ഉത്തരവാദികളായ പോലീസുകാരിൽ നിന്നുമാണ് ഈടാക്കുക. സർക്കാർ ജോലിയും ധനസഹായവും തങ്ങൾക്ക് അർഹതപ്പെട്ടതാണെന്ന് ശ്രീജിത്തിന്റെ ഭാര്യ അഖില പ്രതികരിച്ചു.അതേസമയം പോലീസുകാരിൽ നിന്നും നഷ്ടപരിഹാരം ഈടാക്കാൻ നിയമവശം കൂടി പരിഗണിക്കേണ്ടി വരും.പോലീസുകാർ കുറ്റക്കാരാണെന്ന് തെളിയിക്കണം. കുറ്റകൃത്യത്തിൽ ഓരോ പോലീസുകാർക്കുമുള്ള പങ്ക് വ്യത്യസ്തമായതിനാൽ ഓരോരുത്തരിൽ നിന്നും തുല്യമായി പത്തുലക്ഷം രൂപ പിരിച്ചെടുക്കണോ എന്നും പരിശോധിക്കണം.